Publiká riba 10 Yüli 2025
Willemstad – Sifranan di Senso ta ser uzá entre otro komo punto di referensia ofisial di e sifra di poblashon di Kòrsou pa aña. Esaki ta un di e metanan importante pa tene un senso kada dies aña. Despues ku Senso 2023 a tuma lugá CBS a hasi e ehersisio di rekalkulá e sifra di aña di e poblashon a base di e sifra di Senso.
Awe CBS ta presentá riba su wèpsait e sifranan di poblashon di Kòrsou 2021 te ku 2023 rekalkulá a base di datonan di Senso 2023. Seguidamente tambe CBS ta presentá e sifra nobo di poblashon di Kòrsou pa 1 di yanüari 2025.
Kalkulashon di e sifra di poblashon pa aña
Den e añanan ku no tin senso, e poblashon ta ser kalkulá usando datonan di Kranshi. Pa kalkulá esaki ta hasi uso di sifranan di nasementu, fayesementu, imigrashon i emigrashon. Pa rekalkulá e sifranan di poblashon a uza e biaha aki tambe datonan adishonal manera: registrashon di detenshon di polis, sifranan di yegada i salida na aeropuerto, i statistiknan di turismo.
Kalkulashon nobo di e sifranan di Poblashon
E kálkulonan ku a wòrdu hasí di e poblashon di Kòrsou, ta entre periodo di 1 di yanüari 2021 te ku 1 di yanüari 2023. E añanan promé ku 2021 a keda igual.
| Poblashon di Kòrsou | |||||
| Aña | Poblashon pa prome di yanuari | Kambio | Hende homber |
Hende muhe |
Sex Ratio |
| 2020 | 156223 | -1482 | 71277 | 84946 | 83.9 |
| 2021* | 154741 | -1587 | 70401 | 84340 | 83.5 |
| 2022* | 153154 | 334 | 69605 | 83549 | 83.3 |
| 2023* | 153488 | 2331 | 69685 | 83803 | 83.2 |
| 2024** | 155819 | 296 | 70185 | 85634 | 82.0 |
| 2025** | 156115 | 70310 | 85805 | 81.9 | |
*=rekakulá
** = sifra nobo
CBS ta indiká ku tabatin vários motibu importante ku a hasi influensia den desaroyo di e sifra total di e poblashon Kòrsou delaster añanan ku a pasa. Por ehèmpel tabatin seramentu di Refineria Isla ku konsekuentemente vários persona a emigrá pa otro paisnan. E pandemia tambe a kousa diferente kambio den e poblashon. Na komienso di pandemia diferente grupo di migrante a regresá nan pais di orígen. Despues di e periodo di COVID, ora fronteranan a habri i ekonomia a kuminsá drai bek, hopi hende a bin biba Kòrsou.
Banda di e motibunan menshoná aki por bisa tambe ku Gobièrnu di Kòrsou a lansa resientemente algun inisiativa pa integrá migrantenan mihó den komunidat i pa mehorá e kolekshon di dato tokante nan presensia i aktividatnan.
For di e wèpsait di CBS, https://www.cbs.cw/population por download grátis e tabèl di poblashon ku tur informashon ariba menshoná.
