Publiká riba 03 Febrüari 2026
E desaroyo di e preisnan di konsumidó na Kòrsou pa luna di desèmber 2025
Willemstad : Sifranan di Ofisina Sentral di Statistik (CBS) ku a keda publiká awe, ta mustra ku nivel di preis na luna di desèmber 2025 a baha ku 0,4 porshento kompará ku novèmber 2025. E sifra di inflashon ta 2,0 porshento na desèmber 2025 i a subi ku 0,2 porshento kompará ku novèmber 2025.
Desaroyo di preis pa luna desèmber 2025 kompará ku luna anterior novèmber 2025
E sifra índise di preis di konsumidó (CPI) di Kòrsou a baha ku 0,4 porshento den luna desèmber 2025 kompará ku novèmber 2025. E sifra índise den desèmber 2025 a yega na 104,7 (na novèmber 2025 e sifra tabata 105,1).
Mayoria preis di mayoria di e kategorianan di konsumo a baha den desèmber 2025. E kambionan di preis mas importante tabata e bahada di preis den e siguiente kategorianan: Transporte i komunikashon (-2,1%), Paña i sapatu (-1,3%), Kuminda (-0,6%), Bebida i sigaria (-0,6%), Salubridat (-0,6%), Muebel i aparatonan domestiko (-0,2%) i Rekreashon i desaroyo (-0,2%). Di otro banda, preis den e kategoria di Otro a subi ku 1,9 porshento. E preis den e kategoria di Bibienda (0,0%) a keda meskos.
Desaroyo di preis riba un tempu largu
Inflashon ta reflehá pèrdida di balor di sèn, pues di forsa di kompra, dor di subida di preis di produkto i servisio pa e konsumidó riba término largu (usualmente 12 luna). E sifra di inflashon pues ta duna un indikashon di e subida promedio di kosto di bida, i p’esei ta ser rekomendá komo instrumento pa indeksashon di salario, penshun, ònderstant/ benefisio sosial, suèldu mínimo i otro entrada.
Inflashon den un sierto luna ta ser kalkulá dor di komparashon di e promedio di 12 luna di CPI den e luna konserní ku e promedio di 12 luna di CPI den mes luna e aña anterior. Si kompará e periodo di e último 12 luna te ku desèmber 2025, ku e mesun periodo un aña anterior, e preisnan di konsumidó a subi na averahe ku 2,0 porshento na desèmber 2025. E promedio di 12 luna di CPI a desaroyá for di 102,6 na desèmber 2024 pa 104,7 na desèmber 2025.
Pa mas informashon, por bishitá e wèpsait di CBS: www.cbs.cw/inflationprices
