Publiká riba 03 Yüni 2024
WILLEMSTAD – Djaweps 30 di mei último, miembronan di e ‘Crisisbeheersing- en Rampenbestrijdingsorganisatie’ (CRBo) a bini huntu pa un ehersisio en konekshon ku temporada di orkan. E temporada di orkan anualmente ta kuminsá for di 1 di yüni te ku 30 di novèmber.
E CRBo di Kòrsou ta un tim multidisiplinario, responsabel ku mitigashon di efektonan a konsekuensia di un krísis òf kalamidat, i asina salbaguardiá nos seguridat, salubridat públiko, nos interesnan vital i di medio ambiente.
E CRBo ta konsistí di 10 ‘Emergency Support Functions’ (ESF) i nan ‘liasons’ ku ta e.o. Polis, Brantwer, Ambulans, BT&P, WJZ, Aqualectra, Servisio di Obranan Públiko, Ministerio di SOAW, Direktorado di Komunikashon i Informashon, Ministerio di Hustisia, Ministerio di Desaroyo Ekonómiko, Wardakosta, Meteo, Ministerio di Salú, Medio Ambiente i Naturalesa, Krus Kòrá, CITRO i e ‘Vrijwilligers Crisiscenter Assistenten’.
Durante e ehersisio di djaweps último a pasa den e prosesonan di plan di kalamidat pa ku efektonan di un orkan manera inundashon, pero tambe di suministro di koriente òf telekomunikashon ku no ta funshoná. Kada un ESF/Liaison a duna un ‘update’ di nan preparashon pa e temporada di orkan ku ta kuminsá promé di yüni 2024.
E tim di kalamidat ta hinter aña aktivo bou di kordinashon di e Direktorado di Kòntròl di Riesgo i Maneho pa Kalamidat (DRR) ku alabes tabata responsabel pa e kordinashon di ehersisio. E ehersisio akí tambe a brinda oportunidat na e komandante di brantwer nobo sr. Tromp, ku durante di un krísis òf kalamidat ta e lider operashonal, pa duna guia i kordinashon na e tim di kalamidat durante di e ehersisio i pa logra a metanan ariba stipulá. E ehersisio tabata unu eksitoso i a logra train e diferente prosesonan relatá na un krísis òf kalamidat.
Den e siman di 3 di yüni pa 8 di yüni 2024, DRR lo organisá e di dos edishon di e siman i konsientisashon pa prepará pa kalamidat yamá: “Preparedness week”, ku lo ser klousurá ku e evento ‘Prepare Now Expo’ dia 7 ku 8 di yüni benidero den Sambil. Durante e ‘Prepare Now Expo’ den Exhibition Hall di Sambil, diferente organisashon lo informá i demostrá pueblo di Kòrsou kua ta e trabounan ku nan ta ehersé durante un situashon di krísis òf kalamidat. Pueblo mes tambe lo haña tur informashon nesesario pa prepará mas mihó pa ku efektonan di un krísis òf kalamidat.
Nos ta supliká i urgi tur hende den kuadro di preparashon pa temporada di orkan 2024 pa:
1. Sòru pa tin un plan di kalamidat na kas pa den kaso di un menasa di orkan;
2. Kontrolá ekiponan di emergensia i ekiponan ku ta usa bateria manera radio, flèshlait i telefòn selular. Sòru pa èkstra bateria;
3. Sòru pa kuminda ku no ta daña i sufisiente awa pa bebe (3 liter pa persona pa dia) pa 3 dia;
4. Kòrta palu i mata rondó di kas i limpia bo kura, ya ku takinan ku ta bula rònt por kousa daño na bo kas.
Pa keda informá, bishitá www.kalamidat.cw i ‘download’ e diferente foyeto di informashon tokante orkan pero tambe e diferente krísis òf kalamidatnan ku por asotá Kòrsou.
