Notisia

Willemstad – Djaluna 17 di mart 2025, Sekretario General (SG) di Ministerio di Hustisia a tene un reunion ku un delegashon ku ta konsistí di representantenan di PATH, Kuerpo Polisial, Ministerio Públiko i Kiudo Hudisial. Durante e reunion akí, e delegashon a presentá un relato detayá tokante un interkambio di trabou ku a tuma lugá na Sürnam, kaminda pa tres siman nan a haña informashon balioso tokante e forma ku hustisia na Sürnam ta maneha abusu i trafikashon di hende.

Eksperiensia i lèsnan for di Sürnam

Durante e interkambio, e delegashon di Kòrsou a tene reunion ku vários instansia di hustisia i seguridat na Sürnam, inkluso ku outoridatnan ku ta enkargá ku investigashon i persekuushon di abusu di persona. E eksperiensianan a duna un bista internashonal riba kon proseduranan di detektá, investigá i yuda víktimanan por wordu implementá di un manera más integral i efisiente.

Rekomendashon pa optimalisá maneho di abusu di persona

Basá riba e informashon ku a keda kompartí, e delegashon a presentá diferente rekomendashon ku por ser implementá na Kòrsou pa mehorá e maneho di trafikashon di hende i kontrabanda di hende. E rekomendashonnan ta inkluí:

• Mehorá koperashon interinstitushonal pa garantisá un respuesta mas lihe i koordiná entre PATH, Kuerpo Polisial, Ministerio Públiko, i organisashonnan di protekshon.
• Introdukshon di proseduranan uniformá pa identifikashon i maneho di viktimanan, inspirá pa e modelo di Sürnam ku ta duna un atenshon integral.
• Fortalesé kapasitashon di profeshonalnan ku mas formashon spesífiko pa detektá i investigá kaso di trafikashon di hende.
• Optimalisá “database” pa tene un registrashon mas kompletu i aktualisá tokante e kasonan i tendensianan relashoná ku trafikashon di hende na Kòrsou.
• Fortalesé lei i regulashon pa garantisá ku outoridatnan tin e rekurso nesesario pa persekushon efisiente di esnan ku ta involví na trafikashon di hende.

Ministerio di Hustisia a rekonosé e balor di e interkambio akí i a ekspresá su kompromiso pa sigui traha riba e rekomendashonnan pa logra un maneho mas proaktivo i efisiente di abusu di persona na Kòrsou.

Pa mas informashon, por tuma kontakto ku Ministerio di Hustisia òf bishitá e wèpsait di PATH:

www.path.cw.

Path@minjustcur.com

MAS NOTISIA

Ministerio konserní: Hustisia