Publiká riba 07 Yanüari 2026
Willemstad : Segun sifranan di Ofisina Sentral di Statistik (CBS) ku a wὸrdu publiká awe, e nivel di preis a baha ku 0,1 porshento na luna di novèmber 2025 kompará ku òktober 2025. E sifra di inflashon ta 1,8 porshento na novèmber 2025 i a subi ku 0,1 porshento kompará ku òktober 2025.
Desaroyo di preis na luna di novèmber 2025 kompará ku luna di òktober 2025
E índise di preis pa konsumidó (CPI) di Kòrsou a baha ku 0,1 porshento na luna di novèmber kompará ku luna di òktober 2025. E índise na novèmber 2025 ta 105,1 (na òktober 2025: 105,2).
Na novèmber 2025, preisnan di produktonan i servisionan di tres kategoria di konsumo a bira mas karu, kual ta:
Kuminda (0,2%),
Rekreashon i Desaroyo (0,2%) i e kategoria di konsumo
“Otro” (0,3%).
Mientras ku e siguiente kategorianan di konsumo a baha:
Muebel, aparato- i artikulonan doméstiko (-0,8%),
Bibienda (-0,3%),
Bebida i sigaria (-0,3%),
Salubridat (-0,2%),
Paña i sapatu (-0,1%) i
Transporte i Komunikashon (-0,1%).
Desaroyo di preis riba un termino largu
Inflashon ta reflehá pèrdida di balor di sèn, pues di forsa di kompra, dor di subida di preis di produkto i servisio pa e konsumidó riba término largu (usualmente 12 luna). E porshentahe di inflashon pues ta duna un indikashon di e subida promedio di kosto di bida, i p’esei ta ser rekomendá komo instrumento pa indeksashon di salario, penshun, benefisionan sosial, suèldu mínimo i otro entrada.
Inflashon den un sierto luna ta ser kalkulá dor di komparashon di e CPI promedio di 12 luna den e luna konserní ku e CPI promedio di 12 luna den mes luna e aña anterior. Si mira e periodo di 12 luna te ku luna di novèmber 2025 kompará ku mes periodo un aña promé, preisnan pa konsumidó a subi ku un promedio di 1,8 porshento na novèmber 2025. E promedio di 12 luna di CPI a subi di 102,6 na novèmber 2024 pa 104,5 na novèmber 2025.
Pa mas informashon, por bishitá e wèpsait di CBS: www.cbs.cw
