Desaroyo industrial den área di Santa Catharina
Publiká riba
20 Yüni 2024
Willemstad – Minister Charles Cooper huntu ku e Servisio di Planifikashon Urbano (ROP) a otorgá ofishalmente un pèrmit di konstrukshon na Thielman Global Trusted International Group B.V., TGTI pa konstrukshon di diferente konstrukshon industrial i komersial den e área di agrikultura.
E proyekto ta inkluí konstrukshon di un ofisina, un ‘warehouse’, un ‘greenhouse’ di 10.000m2’ i un area tékniko. Esaki ta situá na Santa Catharina na áltura di Landhuis Santa Catharina. E proyekto ta tene kuenta ku un edifisio di dos piso i 255 lugá di parker, e konstrukshon kompleto ta terminá den 2025.
TGTIGROUP ku CurHydro su visión ta pa desaroyá un fasilidat agrikultural di nivel haltu, multi-fasetá ku lo kreá trabou, ‘boost’ nos ekonomia, krea mas konsenshi di salú, i kontribuí na desaroyo edukashonal i turístiko.
CurHydro ta enfoká pa ta e pioneronan na Kòrsou pa trese teknika agrikultural avansá pa Kòrsou i redusí di forma signifikativo e kantidat di produkto ku ta wòrdú importá aktualmente. CurHydro tin intenshon di ofresé un suministro konfiabel di produkto mas sigur, ménos koster, mas salú i di kalidat haltu pa “Nos Yu di Tera” pa por biba aun mas largu.
E proyekto aki ta marká un kontribushon signifikante na kresementu komersial/industrial pa Kòrsou, dor di kreashon di trabou durante e fasanan di konstrukshon i tambe despues.
