Notisia

WILLEMSTAD – Riba 24 di sèptèmber 2021, Konseho di Minister di Reino a trata petishon di Kòrsou pa haña sosten di likides den forma di un fiansa di 203 mion florin pa kubri gastu di gobièrnu te ku fin di aña.

Di e montante akí Cft a konsehá pa duna Kòrsou 76 mion florin. Di e petishon ku Kòrsou a hasi pa un fiansa di 203 mion florin, a kita e siguiente sumanan: A baha e posibilidat pa por paga provedornan di gobièrnu ku 20 mion; Pa por yena kupo di trabou krítiko den salubridat relashoná ku e pandemia ku 2 mion; E montante pa por ehekutá e pakete di pais ku 2 mion; E posibilidat pa por invertí den entre otro infrastruktura ku 29 mion; I e aporte adishonal di gobièrnu den salubridat (schommelfonds) ku 88 mion. 

Pa por risibí e fiansa, Kòrsou mester kumpli ku diferente kondishon. Konseho di Minister di Reino no a tuma un desision final ainda, pero a duna Kòrsou espasio te ku 29 di òktober pa kumpli ku e kondishonnan i pa laga Hulanda verifiká ku Kòrsou a kumpli.

Mester kumpli ku e siguiente kondishonnan:

1. Entregá un plan ku medida pa baha gastu den servisio di salubridat i seguro sosial, ku ta responsabilidat di minister di GMN i minister di SOAW, pa prevení ku gobièrnu tin ku aportá mas sèn pa kubri défisit den e área akí. Tambe lo baha gastu di operashon di SVB. Pa esei lo hasi un audit di operashon (operational audit) di SVB.
2. Entregá un plan pa minimalisá pèrdida di CMC, ku ta responsabilidat di minister di GMN, pa prevení gastu adishonal pa gobièrnu. 
3. Establesé plannan pa reformá Servisio di Impuesto i nos leinan di impuesto i ahustá maneho di nos sektor di e-gaming, ku ta responsabilidat di minister di Finansa, pa asina generá mas entrada pa gobièrnu.
4. Ahustá e lei pa maksimalisá salario di ehekutivonan den sektor semi gubernamental i empresanan di gobièrnu, ku ta responsabilidat di tur minister.
5. Finalmente mester establesé e agènda di ehekushon (uitvoeringsagenda) pa di kuater kuartal huntu ku Hulanda. Esaki tambe ta responsabilidat di tur minister.

Kòrsou ya a kumpli ku mayoria kondishon. A entregá diferente plan di akshon, pero Hulanda no a haña chèns ainda pa revisá e plannan di akshon. Kòrsou lo kumpli ku tur kondishon promé ku e siguiente reunion di Konseho di Minister di Reino tuma lugá. 

Gobièrnu di Kòrsou lo sigui informá pueblo miéntras ku ta monitòr tur gastu i sigui manehá nos obligashonnan finansiero.

MAS NOTISIA

Ministerio konserní: Finansa