Publiká riba 27 Novèmber 2025
Willemstad – Den kuadro di e proyekto ‘Di Bo, Pa Bo, Ku Bo’ a pone bakinan di shushi den diferente zona rònt Kòrsou. A repartí Kòrsou den kuater zona pa brinda tur habitante e oportunidat di separá nan shushinan i bin deshasí di tur shushi kompletamente grátis den e bakinan di shushi serka di kas. Wikènt tras di lomba tabata tabata e promé wikènt di e último zona kual ta e region Ost di Kòrsou. Pa tres wikènt konsekutivo, habitantenan di Fuik, Montaña, Caracasbaai, Abrahamsz, Bonam i besindario tin chèns pa deshasí di nan shushinan for di 8’or di mainta te ku 5’or di atardi. Wikènt di 22 i 23 di novèmber tabata e promé wikènt den zona ost.
Ki dia mas zona Ost ta habrí?
A sobra 2 wikènt mas den zona ost. Habitantenan di e barionan ariba menshoná por hasi uso di e bakinan di shushi riba djasabra 29 i djadumingu 30 di novèmber i e último wikènt ku bakinan di shushi den zona ost ta djasabra 6 i djadumingu 7 di desèmber 2025. E bakinan tei djasabra i djadumingu for di 8’or di mainta te ku 5’or di atardi.
Ora e zona sera no por deshasí di shushi mas na e lokalidat
Gobièrnu di Kòrsou i Ministerio di Salubridat, Medio Ambiente i Naturalesa (GMN) kier pidi pueblo di Kòrsou pa por fabor no bai deshasí di shushi riba e terenonan kaminda e bakinan tabata presente anteriormente, ni durante siman si e region tin baki den wikènt. E aktividat aki ta ser konsiderá komo “illegale dumping” i ta okashoná molèster pa e área. Alabes e ta trese èkstra trabou di limpiesa pasó mester deshasí di e shushinan i mantené e área limpi. Efektonan sekundario ta ku shushi por bula bai den otro áreanan manera den kura di hende òf riba kaya i molèster di por ehèmpel djaka, muskita i kakalaka pa motibu di shushi.
Transportá bo shushi di forma responsabel
Na momentu ku bo ta bai transportá bo shushinan durante e próksimo dos wikèntnan pa deshasí den e bakinan den zona ost, pero tambe ora bo ta transportá shushi pa ‘landfill’, sòru pa bo hasi esaki na un manera seif. Tapa bo shushi si e ta den baki di ‘pick-up’, mara bo shushi si e ta pone den bahul di bo outo i kore na un velosidat responsabel. Evitá ku shushi ta kai for di bo outo i forma peliger pa otro personanan den tráfiko.
Por último, Gobièrnu di Kòrsou i Ministerio di Salubridat, Medio Ambiente i Naturalesa ta invitá habitantenan di zona Ost i besindario pa pasa wikènt próksimo i deshasí di nan shushinan. E bakinan di shushi i baki pa shushi resiklabel ta na: Abrahamsz/Bonam banda di Arco Iris, Caracasbaai na entrada di Brakkeput, Montaña kaminda antes tabata Hit 100.3 i tambe Montaña/Fuik na Rodricon.
Kòrsou ta di nos tur i huntu nos mester tene nos isla limpi.
