Notisia

Willemstad, 19 di ougùstùs 2025 – Despues di un promé edishon eksitoso, Jazz Vibes Curaçao ta regresá pa su di dos edishon! Ministerio di Desaroyo Ekonómiko (MEO), huntu ku Curaçao Music Support and Export Office, CTB, Renaissance Mall & Rif Fort i CINEX ta orguyoso di presentá un evento musikal di dos anochi ku ta pone lus riba e artistanan multitalentoso di nos isla.

E festival ta tuma lugá komo antesala pa e famóso Curaçao North Sea Jazz Festival i ta posishoná nos sentro di siudat Willemstad komo un berdadero Music City.

Programa di Jazz Vibes Kòrsou 2025

• 25 di ougùstùs – Riffort Village: Hershel Rosario & Band i Tumbao Cubaçao
• 26 di ougùstùs – Wilhelminaplein: Gedion Chandler’s Quintet i Dibo D & Randal Corsen ‘5 years of Muzik Sin Barera’.

Ku Jazz Vibes, MEO ta demostrá kon kultura i ekonomia por kana man na man: dunando sosten na nos músikonan lokal, fortalesiendo turismo i stimulando nos orguyonan nashonal.

Ministerio di Desaroyo Ekonómiko ta invitá pueblo di Kòrsou kompletu i tur bishitante pa ban disfrutá di Jazz Vibes Curaçao dianan 25 i 26 di ougùstùs, di 7or pa 9:30 di anochi.

MAS NOTISIA

Ministerio konserní: Desaroyo Ekonómiko