WILLEMSTAD – Pa medio di un enkuentro festivo dia 13 di mart ta selebrá un logro signifikante den e desaroyo di Disiplina Konsiente na Kòrsou. Durante e anochi aki, Minister di Enseñansa, Siensia, Kultura i Deporte, Sr. Sythree van Heydoorn, a entregá sertifikado na 94 profeshonal ku a terminá e estudio di e buki Conscious Discipline: Building Resilient Classrooms ku éksito. En total 100 participante a tuma parti aktivamente na e programa aki.E grupo di profeshonalnan sertifiká ta konsistí di un representashon amplio di e sektor: lidernan di skol, maestronan, konseheronan interno, trahadónan sosial di skol, personal pedagógiko, remedial teacher, kordinadónan interno, mentornan, personal di fundashonnan di sostén den edukashon, i representantenan di Ministerio di Enseñansa, Siensia, Kultura i Deporte. E diversidat aki ta enfatisá e naturalesa kolaborativo di e movementu ku a wòrdu inisiá.
E inisiativa: invertí den profeshonalnan: E selebrashon ta resultado di un invershon konsiente di Ministerio di Enseñansa, Siensia, Kultura i Deporte den sostené profeshonalnan responsabel pa edukashon i kuido di muchanan di 0 pa 16 aña. A base di e vishon aki a skohe e metodologia di Disiplina Konsiente, desaroyá pa Becky Bailey. Disiplina Konsiente ta un metodologia basá riba evidensia i investigashon, apliká internashonalmente. E ta enserá un aserkamentu basá riba selebro ku ta kuminsá serka adulto promé. Un aserkamentu ku ta transformá skolnan, organisashonnan i ambientenan di kas di un manera amplio dor di enfoká riba outo-regulashon, kultura i bienestar. Inspirá pa e pensamentu di Mahatma Gandhi — “Sea e kambio ku bo ke mira na mundu” —un prinsipio ta pará sentral den e aserkamentu aki: kambio sostenibel ta kuminsá serka e adulto.
E biahe: di entrenamentu pa estudio profundo: E trayekto a kuminsá na 2022 ku un tayer di dos dia pa dieseis lider di skol di fundeshi i fundeshi spesial. Na 2023, a sigui seshonnan di profundisashon ku e mesun grupo, siguí pa un tayer di dos dia pa un grupo mas amplio di profeshonalnan enbolbí den guia i kuido di muchanan di edat 0 pa 16.
E seshonnan aki a wòrdu fasilitá pa dos instruktor sertifiká di Aruba, kendenan a hunga un ròl klave den introdukshon di Disiplina Konsiente na Kòrsou. Durante e fase aki, no solamente a kompartí konosementu, pero tambe a krea propiedat kompartí. Siguientemente, e ministerio a kontinuá e proseso ku un estudio di e buki Conscious Discipline: Building Resilient Classrooms. E fase profundo aki a enfoká riba sigui internalisá e vishon i fortalesé tantu e desaroyo personal komo profeshonal di e partisipantenan.
Di vishon pa impakto: E implementashon di Disiplina Konsiente tin efektonan positivo den tantu enseñansa komo edukashon. Ménos konflikto, mas trankilidat den klas, i relashonnan mas fuerte entre adulto i mucha ta resultadonan ku ta wòrdu testimoniá frekuentemente. Alabes muchanan ta desaroyá abilidatnan manera outo-regulashon, traha huntu i abilidatnan pa solushoná problema.
E siguiente paso: implementashon i salbaguardiá: Ku e finalisashon di e estudio di buki, un fase nobo ta wòrdu introdusí. Den e fase aki, e énfasis ta riba implementashon i ampliashon sostenibel. E tim di proyekto i e grupo di trabou, instituí pa medio di dekreto ministerial, a realisá e proseso aki na nòmber di e Minister di ESKD. Den e fase aktual, nan esfuersonan ta enfoká riba desaroyá un dokumento di entrega, den kua e bista optené i e métodonan di trabou ta wòrdu registrá. E dokumento aki ta sirbi komo un guia pa organisashonnan ku ta haña enkargo pa sigui ku e proseso.
Ekspanshon den edukashon no-formal i enseñanza obligatorio: E ambishon ta pa sigui implementá Disiplina Konsiente, tantu denter di skolnan ku ta enbolbí kaba komo den institutonan nobo. Tambe ta hasi esfuersonan pa sigui apliká e aserkamentu aki den edukashon no-formal, manera edukashon pre-esolar, kuido despues di skol i otro aktividatnan pa hoben.
Un responsabilidat kompartí: Despues di e fase aki, e Ministerio ta asumí un ròl di fiha kuadro, dunando direkshon pa implementashon i supervisá kalidat i progreso na organisashonnan enbolbí ku kontinuidat di implementashon i guia.
E desaroyo aki ta marka un paso importante den direkshon di un kultura pedagógiko mas amplio na Kòrsou, den kua akshon konsiente, seguridat emoshonal, i konekshon ta para central.
Pensamentu final: “E kambio ku nos ke mira den mucha ta kuminsá ku kon nos komo adulto ta skohe pa ta — tur dia di nobo.” Pa mas potrèt por bsihitá : Disiplina Konsiente Kòrsou.
