Willemstad –Dia 17 di ougùstùs nos ta para ketu na e importansia di tur shofùr aktivo den transporte públiko i nan responsabilidat pa transportá tur siudadano ku e diligensia, seguridat i efisiensia nesesario.
Transporte públiko ta un medio hopi importante den nos komunidat i ta yuda e siudadano pa yega fásilmente na su destino, manera entre otro skol, trabou, kas i tambe komo medio pa e por rekreá.
Dia di Transporte Públiko ta netamente pa para ketu un ratu na e importansia di henter e sektor di transporte, su desaroyo, su defisiensia, retonan i naturalmente plannan pa su futuro.
Minister di VVRP Charles Cooper huntu ku Servisio pa Tráfiko i Transporte (UOVV) ta felisitá tur ku ta laborá den e sektor di Transporte Públiko ku e dia aki i ta deseá nan forsa i sabiduria pa sigui ehersé e trabou noble aki na fabor di nos komunidat.
