Willemstad, 17 di òktober 2025 – Riba djasabra 18 di òktober, Kòrsou lo konmemorá huntu ku Union Europeo e Dia Kontra-Trafikashon di EU, un dia dediká na konsientisashon, refleho i akshon kontra trafikashon di hende.
Pa e okashon akí, pafó di Curaçao International Airport lo ta iluminá na koló blou dianan 17 i 18 di òktober, danki na e kolaborashon ku Curaçao Airport Partners (CAP). E akshon simbóliko konhuntu aki ta marka e kompromiso nashonal den e lucha kontra trafikashon di hende i ta sirbi komo un yamada pa konsientisashon, tanto pa residente komo pa bishitantenan di nos isla. E kolaborashon ku CAP a kuminsá den 2024. Den e sala di yegada di Curaçao International Airport tin pia/stap-nan di PATH i den tur toilet tin poster di informashon pa hasi hende mas konsiente di e fenomeno di trafikashon di hende.
PATH, un departemento den Ministerio di Hustisia, ta koordiná tur asuntu relashoná ku trafikashon i trato di hende. E departamento ta enfoká riba oumentá konsientisashon, ehekushon di adaptashon di lei i maneho, i organisá inspekshon na lugánan ora ku ta nesesario. Dor di kolaborashon ku partner lokal i internashonal, PATH ta traha pa un sosiedat kaminda kada persona ta protegé kontra eksplotashon i abusu.
Ministerio di Hustisia i PATH ta ekspresá nan agradesementu sinsero na Curaçao Airport Partners pa nan partisipashon i sosten den e gesto simbóliko importante aki.
Ku e iluminashon di un lugá ikóniko di Kòrsou, nos ta enfatisá ku e lucha kontra trafikashon di hende no ta solamente un obligashon internashonal, sino tambe un responsabilidat komun ku ta pidi atenshon kontinuo, solidaridat i akshon.
