Ekselensianan, miembronan di gobièrnu, representantenan di Parlamento, honorabel outoridatnan i mi kerido pueblo di Kòrsou.
Awe nos ta reuní ku orguyo pa selebrá 15 aña di outonomia. Dia 10 di òktober 2010, Kòrsou a bira ofisialmente un pais den Reino di Hulandes. E 15 añanan akí, ta representá hopi mas ku un fecha den nos konstitushon. E ta 15 aña di kresementu i di re – afirmashon di nos identidat nashonal.
Pa ta un pais outónomo nos no mester tin solamente un himno, un bandera i un gobièrnu propio. Outónomo ta nifiká asumí nos responsabilidat ku e derecho, pero tambe e deber pa goberná nos mes pais. Goberná den un pais outónomo ta un privilegio, pero tambe un gran responsabilidat.
Outonomia, promé ku tur kos, ta un kompromiso moral ku nos futuro. E ta rekordá nos ku tur akshon di gobièrnu, tur lei i tur presupuesto mester keda guiá na bienestar di nos hendenan, pa hustisia, igualdat i desaroyo sostenibel. I kada generashon di lider di pasado, presente i futuro mester honra e konfiansa akí ku transparensia, trabou duru i bista riba futuro.
Den e 15 añanan ku a pasa, Kòrsou a demostrá su resiliensia i kapasidat pa avansá. Te asta den momentunan difísil. Nos a enfrentá krísis ekonómiko, natural i sosial, pero kada biaha nos a salí mas fuerte.
Si nos mira bèk, nos por sinti nos mes orguyoso di e progreso ku huntu nos a logra den e último 15 añanan.
Un sistema di enseñansa den transformashon, pa logra kalidat, inovashon i oportunidat igual. Nos kultura ta mas fuerte, ku nos músika, arte i patrimonionan ku ta testimonio bibu di nos identidat i nos orguyo. Deporte ta den kresementu i ta inspirá nos hóbennan pa promové salú, disiplina i unidat. Un ekonomia diversifiká, ku sektornan nobo manera teknologia, energia sostenibel i ekonomia kreativo. Pero mas importante ku tur, nos siudadanonan ku ta mas konsiente di nan ròl den konstruí un Korsou hustu, partisipativo i solidario.
Tur esaki ta fruta di kurason i mente di hende ku ta kere den Kòrsou. Awor mas ku nunka, nos mester reafirmá ku stima Kòrsou no ta solamente un sentimentu, sino un akshon di tur dia. Ta p’esei nos mester kuida nos tera, respetá nos leinan, eduká nos yunan ku balor i traha ku honestidat.
Stima Kòrsou mester ta un sentimentu mas aya ku nos diferensianan polítiko òf sosial, solamente uní den e mesun propósito i ku bista riba adelanto nos por sigui konstruí e Kòrsou ku nos tur ta soña.
E aniversario aki no ta un punto final, sino un etapa nobo pa nos reflehá i plania pa un mihó futuro. Nos mester sigui fortalesé nos institushonnan, modernisá nos leinan i traha riba un sistema di enseñansa ku ta un pila pa desaroyo humano.
Nos meta mester ta un Kòrsou fuerte, sostenibel i solidario, un Kòrsou ku ta avansá sin pèrdè su rais, ku ta habri su portanan pa mundu sin pèrdè su esensia, ku ta honra su pasado, miéntras ku nos ta konstruí un futuro digno pa tur hende.
—
Sr. Sithree van Heydoorn
Minister di Enseñansa, Siensia, Kultura & Deporte
Kòrsou, 10 òktober 2025.
