Notisia

Ekselensianan, dama- i kabayeronan,

Un kordial bon biní na e resepshon akí ku motibu di Aña Nobo dos mil bintisinku (2025).

Bonbiní spesial awe nochi na mi invitadonan, ku a kontribuí na selebrashon di 70 aña Statüt di Reino Hulandes, aki na Palasio di Gobernador,  fin di aña pasá, esta:

• Minister di Edukashon Sr. Van Heydoorn i empleadonan di su ministerio ku a hasi posibel ku mas di 600 mucha di skol di grupo 8 i alumnonan di Joseph Civilis school, a bishitá e Palasio di Gobernador;
• Direktivanan di skol di Kòrsou, ku huntu ku nan maestronan a sigurá ku ta dediká atenshon na Statüt durante lès na skol.
• Profesor van Rijn, kende a bishitá Palasio ku su studiantenan di Universidat di Kòrsou, pa interkambio di opinion tokante nifikashon di Statüt i nos outonomia í … papel di gobernador.
• E Alto Kolegionan di Estado di Kòrsou, ku ta Konseho di Estado, (Raad van Advies), Kámara di Ouditoria General di Kòrsou,  ( Algemene RekenKamer)i Defensor di Pueblo, (Ombudsman) méskos tambe Korte Komun di Hustisia, kendenan durante e dianan di ‘Kas habrí’ a kontribuí na konsientisashon ku nan banderola- i splikashonnan di kada un su papel denter di nos sistema di gobernashon.
• E departamentu Konsular di mi Gabinete ku a duna splikashon tokante e proseso pa obtene nashonalidat Hulandes.
• Ministerio di Asuntunan Eksterior; ku su dokumentashon di representashon di Reino tur kaminda na mundu i e mensahenan grabá for di vários reprentashon pa nos;
• Ministerio di Defensa i Wardakosta; pa e demostrashon den Bahia di Santa Ana, ku a desplegá nan kapasidat pa kontròl di frontera i asistensia na Kòrsou;
• Konseho Elektoral, ku su eksposishon tokante historia di elekshon liber na Kòrsou;
• Museo Mongui Maduro, ku su kolekshon spesial ku ta informá tokante realisashon di Statüt;
• Grupo Isocco, ku a realsá musikalmente e selebrashon ku un tayer;
• Anto nos no ta lubidá e señoranan ku a hòrna lèter di pinda den kushina huntu ku e muchanan ku a bishitá Palasio di Gobernador, e kuki ku ta sirbi semper na Palasio di Gobernador!
• I di último, pero no ménos importante, nos Minister-Presidènt, Presidente di Parlamentu di Korsou i Presidente di Korte Komun di Hustisia, komo representante di ‘trias politica’. Huntu ku Minister di Edukashon i èks-rèktòr Sr. De Lanoy, nan a ofresé un final memorabel na klousura di Kas habrí di Gobernador riba Dia di Reino. Nan a reflekshoná riba Statüt i riba futuro di outonomia di Kòrsou den e konteksto ei. Esaki a tuma lugá na e mes mesa rondó kaminda a hasi e preparativonan pa fiha Statüt 70 aña pasá, inkluso ku Dr.  Da Costa Gómez, na ‘Landhuis Roi Katochi’.

‘Señora- señornan’,

Statüt ta bibu! I si algu a resaltá durante  ‘Kas habrí di Gobernador’ ta, ku tin gran nesesidat di informashon tokante Statüt, pero spesialmente tokante historia i funshonamentu di nos sistema konstitushonal i atministrativo. Durante di e rekoridonan bou di guia, ku a tuma luga na okashon di Kas Habri, a dedika amplio atenshon na e kambio ku a trese den e manera ku a ordena e pòtrètnan di e ex-Gobernadornan den e Kas di Gobernador i e idea tras di esaki.

Ku e dianan aki nos por a ofresé modestamente huntu ku tur nos partnernan ku a kopera ku nos, durante e dianan di ‘Kas habrí’, mas konosementu tokante nos Gobernashon i esaki ta danki na e entusiasmo di tur nos kolaboradornan .

Pero ku esaki no ta klá. Pasobra ta importante pa kada generashon ku bini sa di unda nos ta bini i determiná unda nos ke bai, basando nan mes tambe riba e entendimentu akí.

Manera kualke ser bibu, Statüt tambe tin nesesidat di atenshon i kuido. I superbibensia no ta bai di mes. Statüt ta manera un kas; un kas ku nos tur ta kompartí di e paisnan di Reino. Un kas ku ta ofresé seguridat i protekshon. Pero den un kas asina tambe ta kota i ta  apliká regla di kas. I manera sa ta kaso den kualke kas di famia, tin bia sa tin hedun.

Pero mi ta konvensí ku nos lo krese den maneho i utilisashon di nos outonomia; i di e oportunidatnan ku e ta ofresé pa koperashon denter di e konstelashon di Reino, pasobra ta esei tabata idea di e fundadónan di Statüt … I nos tarea ta di promové e liña di pensamentu ei, ku mira riba bienestar di nos poblashon.

Ainda ta un poko trempan den e aña nobo aki  pa mira bèk; pero ya mi por bisa ku  personalmente lo mi konsiderá selebrashon di 70 aña di Statüt aki na Kòrsou, komo un di e momentunan mas destaká di mi periodo komo Gobernador.

Nos a drenta awor aña di elekshon; e ora ei nos ta bolbe selebrá e fiesta di nos demokrasia; Pa definishon, for di mi posishon, mi no por bisa nada al respekto; e ora ei ta pueblo ta duna su opinion; i ta asina mester ta den un demokrasia parlamentario. Bon, mi por bisa si ku nos ta un pais ku ta siñando; un lugá, kaminda parsialmente danki na e kontròl- i ekilibrionan (e asina yama Checks and Balances),  integrá den nos konstelashon estatal, mediante prueba i eror (met vallan en opstaan), nos ta progresando; Mi tin tur konfiansa den esei!

Elekshon di e aña akí lo ta e promé organisá pa nos Konseho Elektoral independiente. Riba tur kos, laga nos apoyá, sostene e integrantenan den e labor importante akí.

Mi ta spera i konta spesialmente ku lo ta un lucha di idea polítiko honesto, pa nos por dal e siguiente paso den konfigurashon di futuro di nos pais, na benefisio di henter  e pueblo ku huntu nos ta forma.

Mi ta desea boso i tur boso sernan keri,  tambe na nòmber di Herman, pasa un enkuentro agradabel i riba tur kos, nos deseo pa un aña nobo di bendishon!

Salú.

MAS NOTISIA

Ministerio konserní: Asuntunan General i Promé Minister