Publiká riba 25 Desèmber 2023
Na un distansia kòrtiku di e palasio akí…, na Punda i Otrobanda, siudat monumento, tin katedral di Pietermaai, e moské ‘al Khalífa Omar’ …, e snoa te ainda na uso sin interupshon riba kontinente merikano: Mikvé Israel-Emmanuel, (znoa), i e misanan katóliko Santa Ana i Santa Famia. Anto eseinan ta djis un parti chikitu di tur e kasnan di orashon na nos isla.
de Gouverneur van Curaçao, Hare Excellentie Luicille George-Wout
Aki na nos tera, nos por gosa ku smak di un sòpi di banana…, di un samosa (snèk indio), loempia òf un botram di pan brùin ku ‘oude kaas’ hulandes. Na Kòrsou nos ta selebrá Hanuká, Divali, i Eid al-Fitr (= it al-fitr)(fiesta religioso di mòslemnan) i awe tambe Pasku di Nasementu; tur e fiestanan akí, kada komunidat ta selebrá na su propio manera i segun su propio tradishon. Ta dianan di fiesta ku nòmber diferente pero ku un mensahe universal; ta fiesta di lus, speransa i pas.
Na nos isla tin inkontabel komunidat ta biba na pas ku otro, nos ta respetá tur kas di orashon, anto nos por tin diferensia di opinion…, sin ku niun sorto di kastigu ta kai pa esei. Ta asuntunan importante ku hopi otro pais por tuma ehèmpel serka nos. Mi ta eksperensiá esaki komo un rikesa enorme, algu pa nos ta orguyoso di dje. Loke pa nos ta algu natural, di mes, esei pa hopi hende na hopi lugá na mundu, e dianan akí no ta asina niun ora so.
Nos por a mira e echo akí klaramente demostrá poko dia ei riba dia di pais Kòrsou, 10 di òktober, ora diferente lider spiritual fraternalmente banda di otro a kompartí nan horor i preokupashon debí na e konflikto Israelí-Palestino ku na e momento ei resientemente a eskalá seriamente.
Lamentablemente, e konflikto ei i tur e otro gueranan horibel i sin sentido ku ta bringa rònt mundu no ta yega na solushon fásilmente. Pero nos no ta impotente. Nos por mustra nos kombibensia i nos sintimentu di solidaridat na e famianan afektá pa violensia. Asina tantu hende gueranan ta afektá, kousa nan sufrimentu indeskriptibel … Ta bon pa mundu sa ku na Kòrsou tambe nos ta kòrda ku kompashon tur esnan afektá i nos ta kompadesé i resa pa nan. Mi esposo Herman i ami tambe ta hasi esaki di henter nos kurason.
Historia di Kòrsou tambe a konosé su periodonan skur. Nos Rei, Willem Alexander, a ekspres’é asertadamente den su karta tokante rehabilitashon di Tula, di parti di gobièrnu hulandes; ‘Rehabilitashon di Tula ta nifiká rehabilitashon di un gran hòmber ku a nenga di dobla i a nenga di keda ketu. Su stèm ta sigui zona pa kòrda nos ku finalmente libertat tin e último palabra, pues ta libertat ta vense semper.’ Mi no ta duda ku futuro lo proba ku libertat i pas efektivamente lo tin e último palabra.
Biba huntu na pas aki na nos isla ta un sirkunstansia pa nos tesorá i keda protehá, pero te ainda nos tambe konosé nos propio retonan.
Den mi trabou di sirbi boso tur, mi ta sigui e siguiente kompas: kon nos lo ke pasa nos Komunidat di Kòrsou pa e siguiente generashonnan. Na ki sorto di isla e siguiente generashonnan ta bai krese?
Nos lo ke un isla kaminda nos ta kuida otro, i prinsipalmente esnan ku tin nesesidat di un poko mas atenshon? … Sea ta trata di hóbennan ku ta risibí edukashon den un edifisio eskolar na mal estado, sea ta personanan ku nesesidat médiko, refugiadonan ku ta konta ku un trato humano òf ta henter un generashon ku a yuda konstruí nos pais i ku awor ta biba den un gran insertidumbre durante masha tempu, kisas demasiado tempu, pasobra e penshun ku nan a traha spar p’e ta na diskushon?
Nos lo ke un isla kaminda nos ta biba huntu, kome i fiesta so, òf nos ke un isla kaminda nos ke mira kon ta ku nos bisiña i manera e lidernan spiritual a mustra kaba, nos ta para banda di otro pa duna sosten na ora di mesté? Un isla kaminda no tin kuenta di “nos” frente “nan”. No entre e poblashon pero tampoko entre e paisnan di Reino di kua nos ta forma parti.
Manera entretantu boso a kustumbrá di mi, mi ta gusta sera mi mensahe di Pasku ku un mensahe personal.
Mi kerido yunan di Kòrsou,
E último dies añanan nos a pasa huntu den hopi kos. Nos a fronta vários krísis i manera nos tabata por, nos a lucha lanta atrobe – tin bia ku éksito, otro bia nò. Laga mi splika. Durante tur e añanan, semper a yama mi atenshon ku den nos pais ta eksistí un konekshon profundo entre hende ku hende.
P’esei totalmente den espíritu di fiesta di Pasku, mi tin speransa. Speransa pasobra 10 aña di sirbi komo boso Gobernador mi a mira desaroyo riba diferente tereno; den nos bida riku komunitario, den asosiashonnan kreativo i den trabou boluntario dinámiko. I sí, e desaroyo ei ta kana un pia un pia i sigur no ku e velosidat ku lo mi a gusta mira. Sin embargo, atversidat tambe por sirbi nos di inspirashon. Inspirashon pa hasi e kosnan di un otro forma o di ahustá e tono. Mal edukashon, tantu di palabra komo di echo, no ta afektá solamente toleransia i solidaridat, sino e por provoká tambe distansiamentu i, den kaso pió, eksklushon. Nos historia ta duna nos un mensahe di konfiansa. E ta siña nos ku nos por pasa den e krísis mas fuerte ku tin i sali vensedor, basta nos lucha huntu.
Mi ta konvensí ku huntu nos por logra tantu mas, si nos konsentrá nos diversidat i sigui uni forsa. Esei ta e as den nos bará di karta ku ta permití nos fronta e retonan ku nos ta enfrentá: kambio klimátiko, resepshon di inmigrantenan, enbehesimentu di nos poblashon i e falta di konfiansa den nos institushonnan i den nos demokrasia.
Tur hende ku tin responsabilidat polítiko òf atministrativo tin e gran tarea di ofresé hende stabilidat i speransa. Di atministrashon públiko boso por ferwagt ku meskos ku nan a lucha pa nos pas i seguridat, asina tambe nan lo garantisá boso pas i seguridat. Ami lo ta na boso lado; komo hefe di boso gobièrnu i komo guardian di e pakto di Reino.
Herman ku mi ta deseá bo – unda ku bo por ta i kualke sea bo sirkunstansia personal –, un Pasku felis i bendishoná.
