Publiká riba 26 Ougùstùs 2024
Presentenan un felis atardi,
Mi ta sumamente kontentu di mira kon turismo ta desaroyando, i ta dunando e aliento nesesario ku nos ekonomia tabatin mester i ta trese speransa, perspektiva i konfiansa, pa stimulá e klima di invershon riba Kòrsou. Esaki danki na trabou duru di e diferente stakeholdernan den e industria akí.
I mi ke bisa boso ku mi ta rekonosé i balorá kada aktor ku a i ta kontribuí inkansablemente na e industria di turismo aki ku nan granito.
Awe tardi na un manera partikular mi ta duna e rekonosementu aki na kada persona ku boluntariamente komo miembro di Citro ta pone nan bida i ekspertisio na disposishon pa reskatá bida di otro ser humanonan, inkluyendo turistanan ku ta bishitá nos playanan i hasi uso di e diferente atrakshonnan turístiko marítimo.
I mi ke duna palabranan di elogio tambe na tur spònser, i awe spesialmente na CTB, nos Ofisina di Turismo, ku tambe ta mira, rekonosé i aportá na e trabounan balioso ku boso ta hasiendo akí. Un danki na CTB ku a kontribuí na boso kuerpo ku dos seadoo pa sigui ku boso trabounan riba laman. Mi no tin duda ku e seadoonan aki, huntu ku boso konosementu i ekspertisio lo ta di gran balor pa boso sigui hasi un gran trabou.
Finalmente, danki na boso un biaha mas pa yuda mantené e seguridat di nos komunidat i nos turistanan riba laman, tur momento ku tin mester di boso.
Mashá pabien ku e seadoonan akí i hopi sabiduria i éksito den boso trabounan.
