Publiká riba 23 Sèptèmber 2024
Willemstad – Ayera tardi famia, amigunan di Famia De Jongh i Gobièrnu di Kòrsou durante di un ambiente festivo a risibí e promé kargamentu ku a yega for di Trinidad & Tobago riba Doña Luisa I, un di e barkunan di e flota di Don Andres di famia De Jongh. E barku a keda risibí na Mattheywerf, den presensia di invitadonan i flankiá pa Don Andres I i Hermano Mirlo. Kompania di Tou Kòrsou a risibi e barku ku e saludo di awa i pitu i a kompañ’é drenta haf i mara na werf.
E ruta nobo aki ta sumamente importante pa komersio den nos region i en partikular pa Kòrsou, Aruba i Boneiru. Mirando e retonan riba tereno di Supply Chain na hupnan importante na mundu, i ku tin influensha riba Komersio internashonal dor di rutanan mas largu, mas karu i ku ta subi kosto di bida, un di e strategianan ta pa stimulá mas komersio intra-regional, esta den nos region. “Ku e ruta nobo aki nos ta dal un stap pa yega na mas komersio den nos mes region di karibe” Minister enkargá ku ekonomia Charles Cooper a trese dilanti.
Don Andres ta esun ku ta abastesé nos i islanan ruman ku varios produkto i ta fasilitá komersio entre nos islanan A.B.C. i e ta konektá nos islanan di un forma direkto ku Repúblika Dominikana i awor ku Trinidad. E impakto ta grandi pa nos empresarionan tantu esnan ku ta importá komo esnan ku ta eksportá. Paso den un tempu hopi kortiku nan merkanisa ta yega su destinashon dirèkt. “Nos tin algun reto pa solushona den haf, por ehempel pa e logistiká aki na Kòrsou kana optimal i asina yega na preisnan muchu mas kompetitivo” e mandatario ta sigui bisa. “E ruta ta habri oportunidatnan pa komersio i servisio i esaki ta sumamente importante pa ekonomia. E ta influenshá preis di produkto, e ta pone ku nos por konta ku mas akseso direkto na merkado, kual ta stimulá mas negoshi, krese kupo di trabou i fortifiká nos rol komo un player den region”.
Nos ta bon kontektá ku Trinidad & Tobago.
Nos tin konekshon aereo direkto ku Trinidad & Tobago ku Caribbean Airlines, ku ta un aerolinea di Trinidad i awor nos ta konektá via marítimo pa medio di un empresa naviera di nos islanan ku ta Don Andres. Esaki ta un ehempel hopi kla di komersio bilateral.
Kòrsou komo miembro asosiá di Caricom ta den un posishon faborabel pa yega na akuerdonan komersial mas konkreto. Korsou ku Trinidad & Tobago ta negoshando un akuerdo komersial pa eliminá opstakulonan pa nos produktonan i servisionnan por subi merkado di Trinidad liber di barera i vise versa. Nos ta mira potenshal pa nos servisionan, pero tambe nos produktonan, tantu esnan fabriká akinan komo esnan ku nos ta importá ekslusivamente. Tambe nos Zona Franka tin oportunidat di oro pa abastesé Trinidad ku tur loke e mester manera paña, artefaktonan elektriko i elektroniko, tabako i alkohol, produktonan fresku i “delicatesen”. For di Trinidad nos por trese fruta i berdura, produktonan di konsumo, galiña, manteka, kosmetika, lechi, pa nombra algun.
Ya tin hopi komersio tumando lugá entre Kòrsou ku Trinidad i ku e ruta nobo aki nos ta bai hasie mas grandi ainda. Despues di Trinidad lo sigui mas ruta. Minister Cooper ta hasi un yamada pa ban hasi Kòrsou bek e Hub di komersio den Karibe i ta ekstendé felisitashon na Famia De Jongh i tambe na empresarionan ku a kere den i sostené e proyekto aki tantu na Kòrsou, Aruba i Boneiru tambe na Trinidad & Tobago.
“Sigui invertí! Gobiernu tei pa fasilitá boso pa boso ta eksitoso. Ban pa mas Komersio!” Minister Cooper ta finalisá bisando.
