Notisia

DOS den movementu: Poniendo fundeshi pa innovashon duradero den enseñansa públiko

Willemstad – Aña eskolar 2024-2025 a representá un momentu importante di desaroyo pa skolnan públiko di Kòrsou. Durante e aña eskolar, DOS a implementá varios kambio chikí internamente i a enfoká entre otro riba fortifikashon di e konekshon entre e skolnan i nan dirigentenan. Abase di dialógo kontinuo ku personal i lidernan di skol a identifiká puntonan strategíko di enfoke pa un desaroyo salú i duradero. E aña eskolar 2025-2026 lo sirbi komo preparashon pa inovashonnan mas supstansial riba diferente nivel di enseñansa den aña eskolar 2026-2027.

Inisiativanan pa promové igualdat di oportunidat pa alumnonan: Pa tur mucha por tin un oportunidat igual pa ta eksitoso, DOS ta trahando riba e siguiente desaroyonan:

Skolnan di fundeshi

Na skol Elis Juliana (Tera Kòrá) i na Nelly Winkel (skol LOM na Koraalspecht) lo implementá un programa di immershon dual bilingual. E modelo edukativo aki ta basá riba investigashon sientífiko i keda internashonalmente konsiderá komo e modelo mas fuerte pa enseñansa bilingual. Na e skolnan menshoná den tur lès 50% di tempu di lès lo ta hulandes i 50% di tempu di lès na papiamentu pa tur materia. E modelo aki ta yuda alumnonan pa sinti nan mas sigur den e dos idiomanan, ta subi resultadonan den ámbos idioma i ta benefisioso pa komprenshon di kontenido.

Enseñansa Avansá

Na Skol Avansá Amador Nita lo habri un departamento bilingual hulandes/ingles ku enfoke spesífiko riba deporte i deportistanan. Na Juan Pablo Duarte, lo introdusí un klas di transishon (schakelklas) bilingual hulandes/papiamentu pa alumnonan ku un profil fuerte di AGO i un profil ménos fuerte di VSBO. E meta ta pa guía e alumnonan aki den un trayekto pa kompletá VSBO eksitosamente. Na Scholengemeenschap Otrobanda (Jacques Ferandi i Goslinga) lo (re)introdusí e sektor di Turismo, pa asina kumpli ku e nesesidatnan di merkado laboral lokal.

Enseñansa Sekundario

Den SBO nos lo introdusí, den kolaborashon ku e departamento di maneho di Ministerio di OWCS, e prinsipio di “siña pa bida largu” (lifelong learning), kaminda studiantenan por sigui formashon modular, ku hopi mas fleksibilidat pa finalisá un estudio.

Introdukshon di “DOS den Balansa: e hende i kontenido”

Pa guia tur e desaroyonan aki, DOS lo drenta un trayekto di tempu medio dirigí riba e tópiko “DOS den Balansa: e hende i kontenido”. E trayekto aki tin dos pilar prínsipal: (1) E Hende: ku gran enfoke riba bienestar, desaroyo profeshonal, stabilidat emoshonal i pedagogía apliká pa maestronan, (2) E Kontenido: ku gran enfoke riba uso konsiente i inklusivo di idioma den enseñansa. Ekspertonan i sientífikonan lo dirigí ámbos trayekto den kolaborashonnan lokal i internashonal.

E lansement ofisial di e trayekto aki lo tuma lugá durante e konferensia inisial di DOS ku ta tuma lugá riba 19 di ougùstùs 2025 pa tur e 800 empleadonan di DOS. Ku tur e kambionan aki ku ta parti di un plan stratégiko, DOS ta pone su fundeshi pa un enseñansa públiko modèrno, ku ta invertí den hende, den kontenido i den oportunidat igual pa tur suidadano di Kòrsou.

Pa mas informashon por tuma kontakto ku sra. Nihayra Leona, Hefe di Servisio pa Skolnan Públiko (n.leona@dos.edu.cw / +5999 513 0111)

MAS NOTISIA

Ministerio konserní: Enseñansa, Siensia, Kultura & Deporte