Publiká riba 04 Mart 2025
Ministerio di Hustisia ta lamentá ku indokumentadonan ta sigui riska bida
WILLEMSTAD – Minister di Hustisia a risibí informashon di Wardakosta ku a raportá un insidente lamentabel kaminda un lancha ku indokumentadonan a bòltu serka di kosta di Kòrsou. Den e akto akí, Wardakosta a logra di reskatá un total di 10 persona te ku awor, i ta kontinuá ku buskeda pa posiblemente mas persona ku tabata abordo di e lancha akí. Di esnan ku a logra reskatá a transportá e personanan ku tabata riba e lancha pa Curaçao Medical Center pa por haña tratamentu médiko nesesario. Aktualmente, búskeda ta kontinuá pa por lokalisá personanan ku posiblemente ta falta ainda den e tragedia akí. E operashon di búskeda ta envolví Wardakosta, Polis i otro kuerponan di emergensia, ku ta traha huntu pa por haña i yuda tur persona ku ta falta ainda.
Minister di Hustisia, mirando e esfuersonan a gradisí primeramente tur kuerpo di emergensia i organisashonnan ku a kontribuí na e operashon di reskate aki i ku ainda ta forma parti di búskeda di persona(nan) pèrdí. E dedikashon i esfuerso di e kuerponan ta un yudansa fundamental pa salba bida i maneho di situashonnan di krísis.
Minister di Hustisia ta ripití ku biaha pa Kòrsou den forma ilegal pa medio di lancha ta algu ilegal, di hopi riesgo i peligroso. E tiponan di biahenan aki ta pone bida humano na peliger di forma grave, pa motibu di kondishonnan marítimo i e falta di medida di seguridat riba e tipo di lancha nan aki. Pa e motibu akí, ta rekomendá ku tur persona ku tin plan pa biaha hasi uzo di vianan ofishal i legal. E outoridatnan ta traha pa sigurá ku tin proseduranan kla i sigur pa migrashon pa Kòrsou, i ta importante pa sigui e kamindanan ofisial pa evitá situashonnan trágiko manera esaki.
Minister Shalten Hato, komo Minister di Hustisia, pa medio di e organisashon PATH ta hasi lo máksimo pa duna asistensia na e personanan envolví riba lancha, ku yudansa di slachtofferhulp i otro instansianan pa guia i sostené nan den e proseso di rekonstruí nan bida. Slachtofferhulp ta para kla pa duna apoyo sikológiko, emoshonal i práktiko na esnan ku a pasa den e situashon difísil aki. Ademas, ta tuma e paso nesesario pa investigá kiko a sosodé i kon nos por prevení ku situashonnan semehante no ta tuma lugá den futuro. Outoridatnan lo persiguí di forma penal tambe esnan ku a kometé e akto di trafikashon i/o kontrabanda di hende i lo detené esnan ku a pèrkurá pa e biahe di riesgo aki a tuma lugá.
Minister di Hustisia ta sigui mantené enfoke riba e situashon di migrashon ilegal i tin atenshon spesial pa e kaso akí. Den kuadro di esfuersonan internashonal, ministerio ta intensifiká koperashon ku otro nashonnan i instansianan internashonal pa trata ku e desaroyo akí. Entre otro, Hustisia lo ta presente na e konferensia di ECLAC (SupDivishon di Nashonnan Uni) tokante migrashon, ku lo tuma lugá den luna di mart próksimo. Durante e konferensia, lo trata ku aktuashonnan i strategianan pa manehá migrashon den manera sigur i humanitario, i e informashon i koperashon internashonal lo ta vital pa nos polítika di migrashon lokal.
Ministerio di Hustisia lo no deskansá te na momentu ku tur paso nesesario ser tuma pa garantisá seguridat, hustisia i asistensia pa esnan ku ta afektá den e proseso akí. Minister Shalten Hato ta afirmá su kompromiso pa protehá bida humano i pa lanta konsientisashon tokante e riesgo di migrashon ilegal. Ta hopi importante pa eduká komunidat riba e peliger ku e tiponan di biahenan ilegal ta presentá i pa stimulá tur persona pa imigrá nos isla di e forma legal.
