E di 7 grupo di hóben ta risibí nan sertifikado despues di a finalisá nan di dos fase di e proyekto ‘Un Komienso Nobo’.
Publiká riba
27 Febrüari 2026
Willemstad- Djaweps 26 di febrüari 2026, Gwen Inspires & Co a otorgá 12 hóben ku a terminá e di dos fase di e proyekto ‘Un komienso nobo’. Ministerio di Defensa Hulandes ta responsabel pa e promé fase ku ta e Formashon Sosial (SVT). Despues e hóben ta pasa pa e sigiente fase di e proyekto, kual ta e “Leerwerktraject” (LWT). Esaki ta bou di guía di e organisashon di ehekushon Gwen Inspires & Co. Durante di e di dos fase aki, e hóben a haña guía intensivo pèrsonal i tambe siña fishi ku ta pas ku nan kapasidatnan i alabes prepará nan mes pa subi merkado laboral. E sertifikado ta un prueba di perseveransia, disiplina i resilensia. Ku e dos fasenan aki, Gobièrnu di Kòrsou huntu ku ministerio di Defensa Hulandes ta brinda perspektiva pa futuro di nos hóbennan.
Inisio di koperashon
E proyekto akí ta ser ehekutá den kuadro di palabrashonnan entre Kòrsou i Hulanda, pa lokual ta trata e reformanan den e asina yamá ‘Landspakket’. E reforma akí ta inkluí bou di e tema ‘H18’ i ta wòrdu konsiderá komo ‘Sociaal Vormingstraject’, pues Trayekto di Formashon Sosial. E ministerionan di Hustisia, Desaroyo sosial Labor i Bienestar, Enseñansa Siensia Kultura i Deporte i Defensa Hulandes, tur ta partnernan den e proyekto akí.
Danki na tu organisashon i kompania ku a duna nan aporte na nos hóbennan.
FAJ/Yave, Grupo Servisio Arte Kreativo/ Excellence Center in education, Di Fundeshi te dak, Brasspening Coatings Curaçao, Karpinteria Tuzepla, OBD Security, OEC-caribbean i tur miembro di tim di Gwen Inspires & Co.
Aktualmente grupo 8 kual ta un grupo di hóben femenino ta den e fase di LWT i djaluna 2 di mart próksimo grupo 9 di hóben maskulino ta kuminsá e promé fase di e trayekto.
Inskripshon pa grupo ku ta kuminsá den ougùstùs 2026 ta bai via number di telefòn +5999563 6626, unkomiensonobo2022@gmail.com òf via facebook página Proyekto Un Komino Nobo.
Ministerio konserní:
Hustisia
