Publiká riba 20 Novèmber 2025
WILLEMSTAD – Gobièrnu di Kòrsou i Ministerio di Salubridat, Medio Ambiente i Naturalesa (GMN) ta invitá habitantenan di ‘zona Ost’ pa bin deshasí di nan shushinan den e bakinan di shushi grátis den region ost di Kòrsou. Entrante e wikènt próksimo di 22 i 23 di novèmber i pa tres wikènt konsekutivo, lo tin bakinan di shusi den Montaña, Fuik, Caracasbaai, Abrahamsz i Bonam. Habitantenan por pasa na e diferente lokalidatnan ku tin baki di shushi, pa deshasí di nan shushinan na e manera korekto i seif pa nos medio ambiente.
Fechanan i orario pa zona 4: Ost
Zona 4, kual ta e área Ost lo tin baki di shushi poné pa habitantenan e siguiente wikèntnan;
Djasabra 22 i djadumingu 23 di novèmber, djasabra 29 i djadumingu 30 di novèmber i djasabra 6 i djadumingu 7 di desèmber. Habitantenan di region Ost por pasa deshasí di nan shushinan den wikènt for di 8’or di mahinta te ku 5’or di atardi na e áreanan ariba menshoná.
Lokalidat di e bakinan di shushi den zona Ost
Zona Ost, lo ta e último zona kaminda pueblo di Kòrsou ta haña e chèns pa deshasí di nan shushinan den kuadro ku e kampaña ‘Di Bo, Pa Bo, Ku Bo’. Si bo zona no ta na turno mas i ainda bo ke tira bo shushinan afó, esaki naturalmente ta posibel durante di e wikèntnan ariba menshoná. E lokalidat eksakto di e bakinan di shushi den zona Ost ta: Fuik na Rodricon, Montaña na Cas Grandi kaminda antes tabata Hit 100.3, Caracabaai na Brakkeput i Abrahamsz/Bonam na Arco Iris Supermarket.
Resultado di zonanan anterior
Den e promé region, kual tabata e region Wèst di Kòrsou a kolektá un kantidat di 148.000 kilo di shushi. Den e di dos zona kual tabata region Nòrt di Kòrsou a kolektá un kantidat di 303.000 kilo di shushi. Wikènt último tabata e lastu wikènt kaminda habitantenan di zona Zùit por a deshasí di nan shushinan den e bakinan di shushi. Sifra di e zona aki lo wòrdu informá pronto. E sifranan menshoná ta ekskluí e kantidat di shushinan rekohé na momentu ku a limpia tambe e ‘landfill’ nan ilegal.
Petishon na pueblo
E kantidat di shushi rekohé te ku awor ta demostrá ku e kampaña ‘Di Bo, Pa Bo, Ku Bo’ ku ta para pa konsientisashon i limpiesa di nos isla ta dunando resultadonan positivo. Gobièrnu di Kòrsou i Ministerio di Salubridat, Medio Ambiente i Naturalesa ta hasi un súplika na pueblo di Kòrsou pa yuda tene nos isla limpi. Por tuma nota ku regularmente habitantenan ta sigui pone shushi na e lokalidatnan ku a usa pa pone baki di shushi, apesar ku e zona su turno a pasa kaba, òf ku ta bin deshasí di shushi durante di siman ora ku no tin e bakinan di shushi poné.
Alabes ke invitá pueblo pa despues di e kampaña di limpiesa i konsientisashon ‘Di Bo, Pa Bo, Ku Bo’, pa sigui deshasí di shushinan na e manera korekto. Separá bo shushinan i resiklá tur loke ku por haña un di dos bida i si tin ku tiranan afó, hasi esaki di e forma korekto sea den kliko of na e ‘landfill’ nan di Selikor na Malpais òf Koraalspecht.
Invitashon na habitantenan di zona Ost
Zona Ost, boso ta na turno. Tur habitantenan ta bon biní durante di e tres wikèntnan benidero pa bin deshasi di tur shushi kompletamente grátis. Transportá bo shushi di forma seif i hib’é na e diferente lokalidatnan kaminda ta bai tin e bakinan poné pa tira shushi.
Huntu nos ta mantené nos isla limpi, salú i bunita.
