Notisia

Willemstad- Ta importante pa den e temporada aki tur hóben ku ke sigui nan estudio na Hulanda, hasi un eskoho konsiente di nan estudio den eksterior. Esei ta e promé yabi pa alsa éksito di nos studiantenan ku ta bai sigui nan estudio. E eskoho ta determiná pa gran parti e éksito durante estudio i e éksito despues den bida, ya ku un estudio ta un invershon importante den e karera despues di e studiante.

Sigur si tene na kuenta ku mayoria studiante tin ku hasi un invershon finansiero grandi i akumulá un debe pa por hasi un estudio di mas aña. Esaki ta un di e puntonan importante ku a resaltá siman pasá djamars 7 i djaweps 9 di yanüari último ora gobièrnu di Kòrsou a organisá e promé dos seshonnan di informashon na mayornan i nan yunan ku tin intenshon di sigui nan estudio.

Pa hóbennan ku no tin un idea ainda kiko skohe, ta importante pa hasi un “Studiekeuze test”, e test ku ta yuda determiná e interes di e studiante. Tin diferente posibilidat pa yega na un tèst sea via di un profeshonal o tambe via internet. Banda di esaki tin diferente otro aspekto mas ku tantu mayor i studiantenan mester tene na konsiderashon ora e yu ta bai studia. Pa tur esnan ku ta interesá den e informashon pa yuda alsa e grado di éksito di nos studiantenan, por akudí ba e sitio di gobièrnu pa e presentashon ku Minister di Enseñansa,Siensia, Kultura i Deporte Marilyn Alcalá-Wallé a duna: Presentashon Minister 9 yan 2020.

************************************

MAS NOTISIA

Ministerio konserní: Enseñansa, Siensia, Kultura & Deporte