Notisia

Willemstad – Di akuerdo ku e promé kalkulashonnan di Ofisina Sentral di Statistik (CBS) pa aña 2023, i a base di e datonan disponibel, e Produkto Interno Bruto di Kòrsou a subi ku 4,2 porshento, kompará ku e aña anterior. E kresementu moderá aki ta kontinuashon riba kresementu di e PIB durante e dos último añanan. E oumento di e Produkto Interno Bruto, ta wòrdu atribuí prinsipalmente na e kresementu kontinuo di aktividatnan turístiko.

E Produkto Interno Bruto esta, PIB na preisnan konstante ta un kalkulashon pa midi e tamaño di ekonomia. E kambio den volúmen di e PIB durante un periodo determiná, ta e punto di referensia pa midi e kresementu òf kontrakshon di e ekonomia. E kambio den volúmen ta kambio den balor ku ta wòrdu korigí pa desaroyo di preis.

Ta kalkulá e desaroyo ekonómiko a base di e kresementu di volúmen ku tabatin den e proseso di produkshon i a base di e desaroyo koyuntural. E informashon aki ta preliminar, pa motibu ku no ta tur dato di tur ramo di empresa ta disponibel ainda. Indikadónan ekonómiko ta estadístikanan ku ta duna e státus aktual di e ekonomia di un pais. Esaki ta dependé di sierto área di ekonomia (por ehèmpel industria, labor i preisnan).

E desaroyo ekonómiko den diferente ramo di empresa

• Konstrukshon E tasa di kresementu di e sektor di konstrukshon a disminuí di 7,1% pa 4,9% entre 2022 i 2023. Den 2023 tabatin vários proyekto di konstrukshon grandi ku ta reflehá e desaroyo faborabel den e sektor aki. Apesar di e desaroyonan aki, e kresementu tòg no a yega na e mesun nivel di 2022.
• Komèrsio E sektor di komèrsio a konosé un oumento konsiderabel den kresementu, di 7,9% na aña 2022 pa 9,3% na 2023. E subida aki ta bini dor di e kresementu di importashon di produktonan i diferente aktividat komersial di kompanianan.
• Horeca E sektor di horeca a rekuperá fuertemente despues di pandemia ku un 68% den 2022, miéntras ku e kresementu a baha den 2023 na 17,7%. E aktividatnan den e ramo di empresa di hotèl i restorant a krese ménos fuerte, kompará ku aña 2022. Destinashonnan ku durante añanan anterior tabata presta bon den e periodo aki, a sigui krese, miéntras ku destinashonnan ku den e añanan anterior tabata presta ménos bon, tambe ta mustra sifranan di kresementu positivo awor.
• Transporte E sektor di transportashon a krese den 2022 ku 17,3%, pero e kresementu aki a baha den 2023 na 11,4%. Den e ramo di transporte por opservá un disminushon den e aktividatnan den haf i un avanse signifikante den e aktividatnan na aeropuerto. E kantidat di aktividatnan di tènker, depósitonan di kònteiner i barkunan di karga ku ta drenta haf, ta aktividatnan di haf ku a baha.
• Servisionan Finansiero Tabatin un oumento leve den e kresementu den servisionan finansiero di 1,4% na 2022 pa 2,7% na 2023. E aktividatnan ekonómiko ta mustra un kresementu na bankonan komersial i tambe kompanianan di seguro.
• Gobièrnu i servisionan públiko E sektor aki a rekuperá for di un kontrakshon na aña 2022 pa un kresementu mínimo di 0,3% na 2023.
• Enseñansa (Privá) E sektor di enseñansa privá a eksperensiá un kontrakshon grandi di -3,9% na 2022 pa -5,0% na 2023. Un di e aktividatnan di mas importante ku a keda opservá ta e kantidat di studiantenan ku ta bira ménos.
• Salubridat i Kuido E sektor aki, ku na 2022 a krese ku 4,6%, a krese solamente ku 3,9% den 2023. E indikadónan di salu di mas importante, manera hospitalisashon i bishita di kliente na poli, ta señalá un bahada.

Ekonomia Mundial

Na 2023, ekonomia mundial a krese ku 3,2%, di akuerdo ku e “World Economic Outlook” di Fondo Monetario Internashonal. Den 2023, e ekonomia mundial a sigui krese kompará ku e subida di 3,4% na aña 2022. Ekonomianan avansá a mustra un oumento promedio di 1,6% den 2023. Na 2022 e kresementu aki tabata di 2,6%.

Na aña 2023, ekonomianan Latino Amerikano a mustra un kresementu promedio di 1,5%. Den e region di Karibe, esaki a subi ku 8,3%.

Pa mas informashon tokante otro ramonan empresarial i e desaroyo ekonómiko di aña 2023 por baha e artíkulo “Economische ontwikkeling 2023: Een standhoudende economie” for di e wèpsait di CBS,

https://www.cbs.cw/economische-ontwikkeling-2023-een-standhoudende-economie

MAS NOTISIA

Ministerio konserní: Maneho di Gobernashon, Planifikashon i Servisio Públiko