Willemstad – 19 di mart 2025, Konseho di Minister a bai di akuerdo pa eliminá e moratorio riba Toko i Minimarket. Esaki ta nifiká ku e desishon pa no otorgá pèrmit di establesimentu (vestigingsvergunning) pa Toko i Minimarket ta kaduká. E moratorio aki ta keda eliminá despues ku na òktober 2014 a introdusí esaki pa atendé ku irregularidatnan den e sektor aki.
Di akuerdo ku e desishon di Konseho di Minister, publiká 19 di mart 2025, kada petishonario ku apliká pa habri un lokalidat ku ta bende produktonan di promé nesesidat (levensmiddelenzaken) mester tene kuenta ku e definishon konkreto ku ta konta pa e diferente tipo di lokalidatnan aki. Nos ta distinguí e siguiente tipo di levensmiddelenzaken: Toko, Minimarket, Supermarket, Hypermarket i Convenience Store.
Pa por hasi petishon pa un pèrmit di establesimentu pa kualke un di e tipo di levensmiddelenzaken menshoná, ta rekerí pa entregá un kopia di e pèrmit di konstrukshon (bouwvergunning) di e lokalidat òf un kopia di e aprobashon pa hasi kambio di funshon di e lokalidat (functiewijzigingsverzoek), manera por ehèmpel si e lokalidat ta un restorant i e deseo ta pa hasi esaki un Toko òf Minimarket.
Kategorianan lokalidatnan ku ta bende produktonan di promé nesesidat
Pa por evaluá petishonnan di pèrmit òf kambio di funshon di lokalidatnan ku ta bende produktonan di promé nesesidat (levensmiddelenzaken), e siguiente kategorianan di levensmiddelenzaken ta keda distinguí:
Hypermarket
Un tienda grandi di servisio propio ku tin un área di benta di mas ku 1000m2, kaminda aparte di ta bende produktonan di promé nesesidat, otro artíkulonan di entre otro kas, bibienda i komestibel tambe ta wòrdu bendí. Algun produkto ta wòrdu ofresé tambe na granèl (wholesale).
Supermarket
Un tienda di servisio propio ku tin un área di benta entre 400 pa 1000m2, mas chikí ku un hypermarket, ku ta bende produktonan di promé nesesidat i tambe otro tipo di komestibel manera bèrdura fresku, pan, karni, bebida i artíkulonan di kas. Artíkulo 1, insiso 4, di Legesverordening ta definí un supermarket komo: “un lokalidat ku ta ofresé servisio propio (self-service) i ku tin mas ku dos kassa”.
Toko/Minimarket
Un tienda chikí ku tin un área di benta di ménos ku 400m2, ku prinsipalmente ta bende komestibel i un surtido mas chikí di otro artíkulonan. Toko i Minimarket ta tipo di negoshinan ku ta destiná pa sirbi kasnan den bisindario i por ta sea un tienda ku ta ofresé servisio propio (self-service) òf un tienda ku tin un lokèt kaminda klientenan ta wòrdu asistí personalmente. Benta di alkohòl ta posibel. Artíkulo 1, insiso 4, di Legesverordening ta definí un toko òf minimarket komo: “un lokalidat ku ta ofresé servisio personal por media di un lokèt” òf “un lokalidat ku ta ofresé servisio propio (self-service) ku máksimo dos kassa”.
Convenience Store
Un tienda chikí ku tin un área di benta di ménos ku 100m2, kaminda, entre otro, kòfi, komestibel, snèks, bebida, korant i revista, produktonan di tabako, artíkulonan di baño i remedi (ku ta den benta liber) ta wòrdu ofresé. Un convenience store por bende alkohòl i ta tipikamente situá na skina di kaya, na pòmpnan di gasolin òf den áreanan turístiko. Hopi bia nan tin orario di benta ekstendé te den oranan lat di anochi òf 24/7, pa komodidat di nan klientenan.
E mesun definishonnan ta konta pa levensmiddelenzaken ku ta situá den un kompleho, manera un sentro komersial òf un kompleho turístiko. Ministerio di Transporte, Tráfiko i Planifikashon Urbano (VVRP) den su evaluashon pa otorgá pèrmit di konstrukshon, ta tene kuenta ku lugánan di parkeo i otro faktornan riba tereno di planifikashon urbano.
