Notisia

Entrante promé di yüli 2025 e reglanan nobo pa biaha ku menor pa i for di Kòrsou ta drenta na vigor. Gobièrnu a introdusí e kambionan pa garantisá mihó seguridat di menornan di edat i pa hasi e prosedura na kontrol di frontera más kla i más fásil.

Dokumentonan nesesario ta dependé di e situashon familiar di e menor. Den mayoria kaso ta trata di e siguiente dokumentonan:

• Un ekstrakto largu (destiná pa biaha ku menor di edat) di e menor di edat;
• Un formulario di pèrmit firmá;
• Un ekstrakto for di e registro di outoridat òf un òrdu di korte resien;
• Kopia di identifikashon di e mayornan òf voogd;
• Si ta nesesario un akto di fayesimentu.

Un kambio importante ta ku menornan por biaha solamente ku un formulario di konsentimentu. Un òrdu di korte òf ekstrakto for di e registro di outoridat ta solamente nesesario si mayornan no ta komuniká ku otro i no por firma e formulario.

Ademas, a base di feedback, a agregá informashon adishonal tokante kiko mester hasi si e menor no ta bai skol, kua dokumentonan ta nesesario si un mayor a fayesé i kon por inisiá prosedimentu sumario den kasonan di kustodia andando kaminda un mayor no ta bai di akuerdo ku e biahe.

Pèrmit por eskrito ta rekerí tambe ora ku menor ta biaha ku tersera parti, por ehèmpel pa aktividat relashoná ku skol òf deporte. Den e kaso aki, tur dos mayor òf e voogd mester firma e formulario di pèrmit. Otro kambio ta, ku pa e tipo di biahe nan aki, mester apliká pa pèrmit solamente un biaha pa aña kalendario via skol òf Vreemdelingen Toezicht en Grensbewaking (UVTG).

E gastu pa e dokumentonan rekerí ta 50 florin karibense pa un ekstrakto di gezagregister via gezagregister@caribjustitia.org I 10 florin karibense pa un ekstrakto di Kranshi kual por solisitá via sita na loketdigital.gobiernu.cw.

Pa biahe ku no ta durante temporada di vakashon di skol mester di pèrmit di skol. Den kaso spesial mester entrega un dispensashon of desishon di departamentu di Leerplicht.

Si un di e mayornan ku outoridat no ta duna pèrmit òf no ta alkansabel, e otro mayor por pidi pèrmit di remplaso via Korte. E desishon di korte ta bálido tantu na kontrol na frontera komo na momento di apliká pa pasport.

Pa más informashon òf pa petishon di dokumento por tuma kontakto ku Kranshi via loketdigital.gobiernu.cw, Vreemdelingen Toezicht en Grensbewaking (UVTG) na Rio Canario òf den kaso di emergensia Teamleider Grensbewaking via telefòn 674 0143.

Gobièrnu ta hasi un yamada pa kuminsá prepará trempan, pa asina evitá tardansa òf situashon den kual ta ninga salida.

MAS NOTISIA

Ministerio konserní: Hustisia