Notisia

WILLEMSTAD – Minister di Enseñansa, Siensia, Kultura i Deporte (ESKD) sr. Sithree van Heydoorn a risibí di bishita fotógrafo sr. Maike Eustatius. Durante di e bishita sr. Eustatius kompaña pa su esposa a hasi entrega di su buki na minister i a duna un splikashon di su buki: ‘Curaçao, mi Pais’ ku a keda publiká resientemente.

E promé parti partikular di e buki ta ku e ta un obra di arte ku vários potrèt di Kòrsou ku a keda saka di forma artístiko. E potrètnan ta konta e historia di nos pais Kòrsou i tambe nos historia a keda skibí den esaki na ingles. E otro parti partikular ta ku e buki ta keda presentá den un obra artístiko den forma di e silueta di nos pais i un arka ku 2 strea di nos bandera a keda traha komo kargadó di e buki. E obra ta simbolisá un kargadó speshal pa e buki i ta kreá pa sr. Giovanni Abath. Pa mas informashon di e buki i e obra por tuma kontakto ku Maike Eustatius na +599 9 513 8286 òf via koreo elektróniko na Maikkey13@gmail.com.

Minister di ESKD sr. S. van Heydoorn a keda sumamente kontentu ku e bishita i e regalu. E buki i e obra a keda apresiá komo ku e ta ilustrá nos historia, naturalesa, kultura i paisahenan bunita ku ta forma parti di nos identidat kultural. Na mes momentu minister a gradisí sr. Eustatius i yam’e danki pa e bishita i regalu.
—
KOMUNIKASHON

MAS NOTISIA

Ministerio konserní: Enseñansa, Siensia, Kultura & Deporte