Publiká riba 10 Aprel 2026
Willemstad- Djabièrnè 10 di aprel 2026, un grupo di 23 kliente di Sentro di Detenshon i Korekshon Kòrsou (SDKK), a risibí nan sertifikado di vários kurso ku a keda duna durante e promé periodo di aña 2026.
Kursonan ku a keda duna na klientenan di prizòn tabata e.o.: Kurso di Barbero ku a keda duna pa sr. Poulo, Kurso di Computer Technician duna pa sr. Philips i tambe kurso di Ingles duna pa sra. Ustasia.
Durante un seremonia bunita den presensia di kolaboradonan di kabinèt di Minister di Hustisia, personal di SDKK i demas invitadonan, a hiba palabra sra. Sharissa Llewelyn komo hefe di Onderwijs Vorming en Trainingen, sr. Anthony Hasselmeijer komo direktor suplente di prizòn i tambe e dosentenan di kada kurso ku e keda duna. Tambe a duna rekonosementu na e 3 klientenan ku a sali kursista destaká di e 3 kursonan ku a keda duna na prizòn.
E seremonia a terminá den ambiente ameno ku brindis i tambe ku oportunidat pa tur presente por a felisitá e kursistanan i tambe sosialisá durante e bunita enkuentro aki. Gerensia di SDKK ta sumamente kontentu di e resultadonan di e klientenan ku a terminá e diferente kursonan.
