Publiká riba 20 Sèptèmber 2018
Willemstad – Diferente suidadano di nos pais ta biaha regularmente ku avion pa eksterior pa sea bishita famia, bai ku fakansi, òf pa entre otro motibu di trabou. Nos tur ta deseá pa esaki sosodé na un manera seif i sigur. Internashonalmente paisnan a palabra stándart, i reglanan ku otro pa garantisá e seguridat den aviashon mirando ku aviashon ta konektá paisnan ku otro. ICAO (International Civil Aviation Organization) ta e organisashon internashonal di Nashonnan Uni ku a keda establesé na 1944 pa manehá e atministrashon i gobernashon di e kombenio internashonal di aviashon sivil konosí komo e ‘Chicago Convention’. Un di e palabrashonnan konkreto di ICAO hasí na 2017 ta ku tur pais miembro mester tin un Plan di Seguridat di Estado (‘State Safety Plan’) pa aña 2021. Kòrsou komo parti di Reino Hulandes ta miembro di ICAO i pues Kòrsou tambe mester tin su plan di seguridat di estado pa 2021.
E plan di Seguridat aki la forma un base pa un manera nobo di traha di e outoridat di aviashon lokal, pero tambe di tur aktornan den e sektor di aviashon. Huntu e partnernan aki mester bai desaroyá un Sistema di Maneho di Seguridat (‘Safety Management System’). Tur aktor mester traha huntu i kompartí konosementu i informashon kual ta e pilarnan pa un implementashon eksitoso. Pa logra esaki mester tin tambe un kambio di kultura, tantu denter di e diferente kompanianan komo den e relashon ku e outoridatnan di aviashon a base di rèspèt i konfiansa konhunto.
Den e kuadro aki, Outoridat di Aviashon Sivil di Kòrsou (CCAA) a organisá un workshop titulá ‘State Safety Program’ dianan 3, 4, i 5 di sèptèmber último. Meta di e workshop aki tabata pa trese tur aktor den e sektor di aviashon na Kòrsou huntu pa kuminsá traha riba e Plan di Seguridat di Estado ya menshoná.
Esnan ku a partisipá na e workshop tabata representantenan di CCAA, CAP, DC-ANSP, EZ Air, Divi Divi, Insel Air, UCA i tambe un representante di Prokurador General, Swissport, FedEx en WWSP. E workshop tabata na enkargo di Jos Wilbrink di Direktorado di Aviashon di Ministerio di ‘Infrastructuur en Waterstaat’ di Hulanda. Presentenan na e workshop a diskutí ampliamente riba mehorashon di e seguridat di aviashon na Kòrsou.
Minister di Tráfiko, Transporte i Planifikashon Urbano (VVRP) Sra. Zita Jesus-Leito a entrega sertifikado na partisipantenan na final di e workshop.
Ta konosí pa komunidat ku Kòrsou ta den kategoria 2 pa loke ta e stándartnan ku Federal Aviation Administration (FAA) ta stipulá. E stándartnan aki ta parti di e Chicago Convention ya menshoná. Minister Zita Jesus-Leito huntu ku CCAA ta trahando duru pa hiba Kòrsou bek na kategoria 1 i na momentu ku esaki ta e kaso, Kòrsou lo invitá FAA pa bin hasi un oudit pa konstatá esaki.
Tambe tin un ouditoria di ICAO mes plania na 2019 kaminda lo evaluá henter Reino Hulandes su kumplimentu na tur stándart stipulá den e Chicago Convention. E trayekto aki ta kana paralelo na e trayekto di kategoria 2 i na e trayekto pa yega na e Plan di Seguridat di Estado.
Aviashon ta un prioridat pa Gobièrnu di Kòrsou mirando ku nos ta un isla i konektividat aéreo ta di vital importansia pa nos komunidat.
