Publiká riba 12 Yüni 2025
Willemstad – Riba 2 i 3 di yüni 2025, European University Institute (EUI) a tene un entrenamentu yamá “EU Sanctions in Practice: Effectiveness, Judicial Review and Compliance” pa representantenan di diferente sektor na Kòrsou. E entrenamentu a tuma lugá den sala pa kurso di Banko Sentral di Kòrsou i Sint Maarten. E inisiativa aki ta konektá direktamente ku e resien publikashon di “Omnibus-Sanctiebesluit Curaçao (P.B. 2025, no. 52)”, i ku e nombramentu di entidatnan enkargá ku ehekushon, kòntrol i supervishon riba kumplimentu ku sanshonnan internashonal.
Komo un pais den Reino Hulandés, Kòrsou tin e obligashon pa kumpli ku sanshonnan internashonal, speshalmente esnan di Unión Europeo (EU). Ta implementá i apliká e sanshonnan aki na Kòrsou pa personanan, organisashon, negoshi, gruponan no estatal i pais. Na nivel di henter Reino ta trata pa laga siudadano, empresa i institushonnan sa, kiko ta e obligashonnan ku ta sali for di e sanshonnan internashonal. Esaki por inkluí restrikshon di komersio, prohibishon di biaha òf frismentu di kuentanan.
E meta di sanshonnan internashonal ta pa pone preshon riba pais, organisashon òf hende ku ta komportá na un manera ku ta kontra lei internashonal, kontra derecho humano òf kontra balornan fundamental na nivel internashonal. Imponé sanshon ta un instrumento di maneho internashonal pa logra kambio den komportashon sin ku mester hasi uso di forsa militar.
Gobiernu di Kòrsou ta di opinion ku ta importante pa servisionan públiko, entidatnan ku ta hasi supervishon i sektor privá ta bon informá i prepará tokante nan ròl den kumplimentu ku sanshonnan.
