Publiká riba 29 Mei 2024
WILLEMSTAD – Riba djárason 29 di mei 2024, Federashon Deporte i Olímpiko Kòrsou (FDOK) a hasi un bishita serka Konseho di Minister. Durante di e bishita akí FDOK a lansa su kampaña ku e lema “Ban Sostené Deporte” den forma di un luna di kolekta pa asina yuda rekoudá fondo pa deporte. FDOK su ophetivo ta pa kolektá un montante di NAfl. 300.000.00.
Meta di e luna di kolekta akí ta pa:
1. Yuda finansiá diferente di su proyektonan;
2. Yuda sostené atletanan prometedor;
3. Sigui yuda miembronan;
FDOK su mishon ta pa traha na bienestar di deporte kompetitivo, pero pa motibu di likides limitá no por duna e sosten nesesario ku deporte meresé. E luna di kolekta ta unu di sumo importansia pa finansieramente yuda ku desaroyo di deporte na Kòrsou.
Pa inisiá e proyekto akí direktiva di FDOK a aserká Promé Minister Pisas ku un petishon pa por hasi apertura ofishal di e “luna di kolekta” serka Konseho di Minister.
