Notisia

Willemstad- E Siman di Kultura 2019 ta dediká na krea i ta pone enfoke riba kreatividat di e hende i kon e hende por usa su kreatividat pa generá un entrada sostenibel. Tin un término ku ta usa pa esaki ku ta kai bou di e asina yamá “Orange Economy” òf “Economia Naranja”. Den Papiamentu Ekonomia Oraño.

Dikon ta usa e koló oranjo ora ta papia di kreatividat? E koló oranjo histórikamente ta konektá ku hubentut i felisidat. Mayoria ta konsiderá oranjo e kolor ku ta duna mas alegria, hopi biaha asosiá ku kultura i kreatividat. Mas aún e koló oranjo ta prosedente di e fruta apelsina ku un hende por primi i saka su jus; pues ku esaki ta ilustrá e proseso di saka lo máksimo for di algu i krea algu otro.

E ekonomía o industria kreativo ta e sector di e ekonomía ku ta trata e generashon di idea i di konosimento. E ta konsentrá riba partikularmente e industria kultural konsistiendo di arte (entretenimentu, diseño, arkitektura, publisidat, gastronomía) y e ekonomía di konosimentu (edukashon, teknología, informática, telekomunikashon, etc). Kòrsou tin gran potenshal riba e tereno aki i den e Siman di Kultura ta pone aksento riba e diferente fasetanan di ekonomía oranjo i e potenshalnan riba diferente area kultural.

Minister Marilyn Alcalá-Wallé ta deseá hinter pueblo di Kòrsou un felis Siman di Kultura, yená ku positivismo sosteniendo otro, enkurashando i empoderando otro pa sigui konstruí un mihor Kòrsou!

**Foto nan ta kortesia di fotógrafo sr. Jacintho de Jesus 

MAS NOTISIA

Ministerio konserní: Enseñansa, Siensia, Kultura & Deporte