Notisia

Miles di mucha ta deskubrí e forsa di lesamentu durante e promé Reading Festival Kòrsou. Evento di dos dia ta uni studiante, outor i buki pa stimulá plaser di lesamentu i desaroyo di idioma

WILLEMSTAD – E Ministerio di Enseñansa, Siensia, Kultura i Deporte ta organisá, huntu ku Stichting Biblionef Hulanda, Universidat di Kòrsou (UoC) i Biblioteka Nashonal Kòrsou, e promé Reading Festival Kòrsou. Durante e evento di dos dia aki, ku lo tuma lugá riba djabièrnè 20 i djasabra 21 di mart 2026, e enfoke ta riba stimulá plaser di lesamentu serka di miles di mucha. E preparashon pa e Reading Festival Kòrsou ta den pleno progreso. E organisashon a traha riba un programa ku ta inspirá kaminda muchanan por será konosí ku buki, kuenta i idioma den un forma interaktivo. E festival ta ofresé un variedat di aktividatnan pa stimulá lesamentu, manera workshop di outor, seshon di lesamentu na bos haltu, weganan di idioma interaktivo i un eksposishon di buki. Riba djabièrnè 20 di mart, alumno di 21 skol básiko lo partisipá den un programa spesial ku ta enfoká riba mehorá abilidat di lesa i plaser di lesa.

E aktividatnan lo tuma lugá na Johan Mauritsschool na Willemstad. Alumno di grupo 5 di enseñansa fundeshi lo partisipá den workshop di eskritor, seshon ku ta wòrdu duna pa studiante maestro i diferente aktividatnan interaktivo di idioma. Festival di lesa pa mucha te 16 aña Riba djasabra 21 di mart, e Reading Festival lo ta habrí pa mucha i hóbennan di 0 te ku 16 aña. E aktividatnan lo tuma lugá di 10’or di mainta te 3’or di atardi na skol di fundeshi Johan Maurit na Willemstad. Durante e dia aki, muchanan por partisipá den un programa amplio ku aktividatnan edukativo i kreativo ku ta stimulá plaser di lesamentu i desaroyo di idioma. Riba e programa tin, entre otro, seshon di lesa na bos haltu, kontamentu di kuenta, tayer kaminda muchanan por siña kon skirbi nan propio kuenta i seshon interaktivo ku outornan. Ademas lo tin aktividatnan di músika i baile, un tayer di tambú i tayer digital. Pa muchanan chikí lo tin momentu spesial di konta kuenta, miéntras ku muchanan mas grandi por partisipá den aktividatnan kreativo di skibi i konta kuenta.

Banda di e tayernan, bishitantenan tambe por bai na un zona kreativo, un zona di entretené mucha, un huki di pa pinta kara i un marshe pa mucha. Asina e festival ta un dia edukativo i agradabel pa henter famia.
Riba djasabra 21 di mart, muchanan por disfrutá di lesamentu liber, un eksposishon di buki, tep pa lesa, un biblioteka digital i bukinan odio pa skucha. Muchanan mester bishitá e festival bou di supervishon di un mayor di edat. Donashon di buki i premio Despues di Festivalnan di lesamentu na Sint Maarten i Aruba, awor e festival ta wòrdu organisá na Kòrsou tambe pa stimulá plaser di lesamentu bou di muchanan.

Durante e “Reading Festival” lo hasi donashon di mas ku 2.500 buki, pa hasi lesamentu mas aksesibel pa muchanan na Kòrsou. Ademas, alumnonan partisipante lo tin chèns pa gana premio atraktivo. Skolnan partisipante lo risibí buki, pa asina e stimulá lesamentu por sigui despues di e “Reading Festival”.

—

Komunikashon

MAS NOTISIA

Ministerio konserní: Enseñansa, Siensia, Kultura & Deporte