Notisia

WILLEMSTAD – Den kuadro di e aktividatnan di ‘Luna di Matemátika’ ku ta keda selebrá tur aña na luna di mart, Kolegio San Dominico a inkorporá den un forma kreativo e uso di matemátika den algun lès. Alumnonan sumamente entusiasmá, a siña hasi uso di entre otro maneranan pa midi usando líkido i hasiendo ehersisio. Den e forma akí, e skol a duna realse na e tema pa e aña akí kual ta “Matemátika ta Uni” (Mathematics Unites).

Representantenan di Komishon Nashonal di UNESCO i Fundashon Tur Ta Konta a pasa na Kolegio San Dominico pa eksperensiá e diferente aktividatnan i lo sigui na diferente skol durante henter luna di mart. Dia 14 di mart, ta selebrá e Dia Internashonal di Matemátika i den kuadro di esaki lo tin un selebrashon ofisial ku ta tuma lugá na Emmy Berthold School. Na e okashon akí tambe kabes di skol Jufrou Eveny Maria- Lucacius i Jufrou Emely Henrietta a risibí e proklamashon firmá aña pasá pa Gobièrnu di Kòrsou, Ministerio di Enseñansa, Siensia, Kultura i Deporte, Komishon Nashonal UNESCO Curaçao i Fundashon Tur Ta Konta.

UNESCO Kòrsou i Fundashon Tur Ta Konta ta komprometé pa sigui traha ku e skolnan, organisashonnan konserní i ku komunidat riba formashon, konsientisashon i mas aktividat enfokando riba matemátika anualmente den luna di mart.

Pa mas potrèt klik aki: Fiesta di Matemátika na Kolegio San Dominico

MAS NOTISIA

Ministerio konserní: Enseñansa, Siensia, Kultura & Deporte