Publiká riba 30 Yüli 2025
Willemstad – Gobièrnu ta dal un paso krusial den su esfuerso pa brinda Kòrsou un transporte públiko moderno i efisiente. Futuro di transporte públiko ta ‘smart’ i sostenibel, ku bùsnan eléktriko inteligente kaminda pasaheronan tin akseso na WIFI tantu riba bùs komo na parada di bùs, konektá ku aktualisashon den tempu real, ku posibilidat pa plania ruta i hasi pago digitalmente. E futuro akí ta hasi bida fásil i aksesibel pa tur hende i ta bon pa medio ambiente. Den un bisá, e ta e manera di move ku ta rápido, sigur i sostenibel.
E futuro akí di transporte públiko ta esun ku gobièrnu a skohe pa Kòrsou i lo ta na enkargo di ABC Busbedijf den un struktura nobo. Entrante promé di ougùstùs próksimo, Integrated Utility Holding (IUH), lo ta enkargá ku maneho interino di ABC Busbedrijf. A skohe IUH basá riba nan konosementu i eksperensia ku transformashon, elektrisidat, internèt i nan abilidat pa atendé krísis eksitosamente. E mandato ku gobièrnu lo duna IUH ta konkreto. Den e próksimo 12 luna deliniá e plan ku ta hiba pais Kòrsou na e transporte públiko di futuro. E plan na final mester enserá ku kalidat di servisio ta subi i preis di transporte públiko ta baha.
IUH a apuntá sr. Raycelli Seferina komo direktor interino, ku lo guia ABC Busbedrijf den e fase akí. Sr. Seferina ta un ehekutivo ku eksperensia amplio tantu den área tékniko komo esun finansiero loke ta hasié e persona indiká pa e trabou.
Transporte públiko rònt mundu ta supsidiá pa Gobièrnu i nos no ta eksepshon. Den e futuro di nos transporte públiko ta premirá ku, una bes kalidat di e servisio subi, su uso tambe lo subi loke lo por baha e supsidio di gobièrnu pa transporte públiko. Den kaso ku e supsidio ketu bai ta nesesario, e supsidio akí ta pa kubri gastu di un servisio di kalidat.
E mesun atenshon ku nos tin pa klientenan di ABC Busbedrijf i nan nesesidatnan nos tin tambe pa tur e empleadonan di ABC Busbedrijf. Nos kompromiso ta pa brinda e trahadó di ABC Busbedrijf un esfera i kondishon di trabou hustu kaminda e por krese, kompania ta krese i Kòrsou ta krese.
