Publiká riba 20 Desèmber 2024
MINISTER SHALTEN HATO DI MINISTERIO BPD TA ANUNSIÁ
Willemstad – Djaweps dia 19 di desèmber 2024, a kuminsá ofisialmente ku un di e proyektonan pa progreso i na benefisio di tur empleado públiko di Kòrsou. Minister Shalten Hato di ministerio di Maneho di Gobernashon, Planifikashon i Servisio Públiko ( BPD) orguyosamente ta anunsiá ku gobièrnu awor tin su propio ‘Online Academy’.
Despues di un periodo di prueba ku 500 ámtenar, Gobièrnu a tuma e desishon pa hasi e ‘Online Academy’ aksesibel pa tur ámtenar. Ta amplia e kantidat ku no ménos ku 900 e-learning. Esaki ta nifiká ku 900 ámtenar mas ta haña akseso na kursonan digital.
Nos ta bibando den un era digital, kaminda komunikashon i akseso na informashon mas i mas ta tuma lugá pa medio di teknologia digital, plataformanan virtual, ‘social media’ i aparatonan móbil ku ta konosí komo ‘mobile devices’. E mundu ta kambiando rápidamente ku e inovashonnan ku tin na e momento aki. Digitalisashon, teknologia nobo i retonan den nos komunidat ta pidi pa un gobièrnu fleksibel i bon prepará.
Ku e akademia online, nos ta krea un ambiente di studia fleksibel i aksesibel ku ta apoyá tur ámtenar den nan desaroyo personal i profeshonal. Nos ta invertí den nos ámtenarnan pa nan siña i krese, i alabes kompartí pa mehorá nos servisio na e pueblo di Kòrsou.
