Publiká riba 23 Mei 2024
Willemstad – Djaweps, 23 di mei 2024, minister Ornelio ‘Kid’ Martina a inougurá e siklo di tayernan tokante Inteligensia Artifisial pa Gobièrnu di Kòrsou.
Den presensia di alto funsionario i invitadonan den sala di Stichting Overheids Accountants Bureau (SOAB) a tuma lugá e inougurashon di siklo di tayernan tokante Inteligensia Artifisial. Esaki ta un di promé inisiativanan den kuadro di e Programa Stratégiko di Formashon i Desaroyo pa tur Ámtenar. Ministerio di Maneho di Gobernashon, Planifikshon i Servisio Públiko a lansa esaki 22 di aprel último. Ku e meta pa saka máksimo benefisio di e potensial di Inteligensia Artifisial. Esaki na su turno lo impulsá kambio positivo den gobernashon i nos komunidat.
Gobièrnu di Kòrsou tambe ta sigui e desaroyonan aki di aserka paso Inteligensia Artifisial a penetrá den tur área di nos bida. Espesialmente den industrianan, ekonomianan, i sosiedatnan globalmente.
Pa e motibu aki e promé tayer ariba menshoná ta brinda e plataforma ideal pa kompartí konosementu, i desaroyá strategianan pa uso di Inteligensia Artifisial pa benefisiá nos Kòrsou. Ekspertonan riba e tereno aki lo presentá despues di e tayernan informe pa gobièrnu tene na kuenta retonan i puntonan di atenshon den e kuadro di e desaroyonan nobo ku Inteligensia Artifisial ta trese kuné.
