Publiká riba 05 Mart 2026
KOMUNIKADO DI PRENSA KONHUNTO
Willemstad – For di promé di aprel 2026 Banco di Caribe N.V. lo fungi komo e banko di kas nobo pa Gobièrnu di Kòrsou.
Gobièrnu di Kòrsou ta hasi uso di un banko di kas pa ehekushon di su asuntunan bankario diario, di kual entre otro mantenshon sentral di fondonan di gobièrnu, prosesamentu di págonan entrante i saliente i maneho efisiente di fluhonan monetario di ministerionan i instansianan gubernamental.
Ta selekshoná un banko di kas di gobièrnu pa medio di un destaho públiko pa un periodo fiho (mínimo 5 aña). Ministerio di Finansa resientemente a kana e proseso di destaho públiko, for di unda a selekshoná Banco di Caribe komo e banko di kas nobo di gobièrnu.
E selekshon di e banko di kas aki, ta enserá un relashon bankario stratégiko na unda Banco di Caribe, den estrecho kolaborashon ku Ministerio di Finansa, lo sòru pa un ehekushon kuidadoso i konfiabel di e prosesonan di pago diario i e maneho di likides operashonal di Gobièrnu di Kòrsou. E kolaborashon aki lo kontribuí alabes na promové inklushon finansiero pa medio di aksesibilidat na servisionan bankario moderno i formanan di pago digital pa un grupo amplio den komunidat.
E kolaborashon nobo lo kuminsá dia promé di aprel 2026. Den preparashon pa yega na e fecha aki, Gobièrnu di Kòrsou i Banco di Caribe lo komuniká, na tempu i aktivamente, eventual kambionan i konsekuensianan di esaki pa siudadanonan, empresa i otro ‘stakeholder’.
