Publiká riba 16 Sèptèmber 2025
Willemstad – Ministerio di Salubridat, Medio Ambiente i Naturalesa (GMN) ta lansa pa e di dos biaha e kampaña pa limpiesa i konsientisashon sosial “Di bo, Pa bo, Ku bo”. E kampaña ta enfoká riba limpiesa di nos isla, komo paso importante pa promové salubridat públiko. Meta ta pa krea un kultura di responsabilidat komun. Aña pasá, entre ougùstùs pa desèmber, a kolektá un total di 24 mion kilo di shushi durante “Di bo, Pa bo, Ku bo 2024”. Gobièrnu di Kòrsou ta kontentu ku e resultado i alabes ku e progreso di e kampaña nashonal di limpiesa. Motibu tambe pa ripití e kampaña i sigui konsientisá nos komunidat.
Pa e aña aki e periodo di e kampaña ta di 20 di sèptèmber te ku 7 di desèmber 2025. Den e periodo aki lo tin e bakinan grátis pa rekohé shushi den bario i vários akshon pa mehorá limpiesa den bario. Den e di dos edishon akí di “Di bo, Pa bo, Ku bo” e enfoke ta mas tantu riba separashon di shushi. Ku otro palabra, a skohe pa duna mas atenshon na klasifikashon di shushi i sostenibilidat. Tene Kòrsou limpi ta bira mas fásil ora komunidat ta komprondé ku shushi por tin balor. Mas i mas material ku normalmente nos ta tira afó, por biba un bida mas, si nos resiklá òf bolbe huza esaki. Gobièrnu ta traha riba maneho di shushi nobo ku ta enserá separashon di shushi resiklabel manera plèstik, karton, papel, metal i glas, pero tambe shushi ku por bira kòmpòst manera residuo di fruta, bèrdura, kòfi, saku di té, kaska di webu i tambe taki, blachi i yerba di kurá. Asta restunan di konstrukshon, manera betòn kibrá i klenku por resiklá na un kompania lokal.
Pa e periodo benidero tin kònteiner pa shushi den kuater zona di Kòrsou. Ta publiká kua zona ta na bùrt den medionan di komunikason i via kanalnan ofisial di Gobièrnu.
Zona 1: Wèst ta bira e promé zona.
Kuminsando djasabra, 20 di sèptèmber i djadumingu, 21 di sèptèmber próksimo, tin baki di shushi durante tres (3) wikènt konsekutivo for di 8’or di mainta te ku 5’or di atardi. E bakinan di shushi lo ta ubiká na vèlt di Westpunt, vèlt di Barber, dilanti di Sentro di Bario di Soto, banda di misa di Tera Kòrá i na Nos Logro Minimarket na Boka Samí / St. Michiel. Tin kònteiner pa shushi resiklabel tambe.
Apertura ofisial riba World Clean Up Day 2025.
Riba djasabra, 20 di sèptèmber 2025, World Clean Up Day, tin apertura ofisial di e kampaña “Di bo, Pa bo, Ku bo 2025”. Riba e dia aki, tur aña di nobo miles di boluntario na Kòrsou ta piki shushi kant’i kaya, riba nos playanan i den laman, pa hasi nos isla mas limpi. Ku e apertura ku ta kai nèt riba e dia ei, Gobièrnu ke mustra su apresio pa tur e boluntarionan i ke prolongá e periodo pa limpiesa hopi mas largu ku djis un dia.
E apertura ofisial ta tuma lugá djasabra, 20 di sèptèmber na Nos Logro Minimarket na Boka Samí / St. Michiel, kuminsando for di 7’or di anochi te ku 9’or di anochi. E ta un aktividat pa pueblo i habitante di tur bario den Region Wèst. Promé Minister Gilmar Pisas i Minister Javier Silvania lo hiba palabra i animashon ta na enkargo di Hóben na Timon.
Gobièrnu di Kòrsou ta invitá tur suidadano pa partisipá na e komienso di un temporada di limpiesa i kolaborashon. Huntu nos ta sigui traha pa un isla mas limpi, mas sostenibel i mas saludabel.
