Willemstad – Gobièrnu di Kòrsou a lansa awe ofisialmente e proyekto Rib’e Lugá. Un trayekto temporal di registrashon i legalisashon pa personanan indokumentá ku ta bibá na Kòrsou.
Rib’e Lugá ta un inisiativa di Ministerio di Hustisia ku tin komo meta pa pone mas òrdu, klaridat i dignidat den un situashon ku pa hopi aña no tin un solushon struktural. E trayekto ta ofresé un posibilidat real pa esnan ku ya ta forma parti di nos komunidat, regla nan estado legal, di un manera kontrolá, transparente i hustu. Rib’e Lugá ta aplikabel pa personanan ku por demostrá ku nan a drenta Kòrsou promé ku 13 di novèmber 2025, ku nan ta bibando na Kòrsou ainda i ku nan no tin antesedente penal. E fecha aki a keda stipulá pa prevení konfushon i ekspektativa inkorekto.
Rib’e Lugá lo kuminsá dia 1 di mei 2026. Registrashon lo ta habrí pa un periodo di tres luna i lo tuma lugá di forma digital. Durante di e periodo aki, ta evaluá tur petishon segun kriterianan kla i definí, ku posibilidat pa risibí un pèrmit di estadia temporal di 1 te 3 aña, dependé di e propósito di estadia. E trayekto ta ofresé diferente ruta pa legalisashon, manera pa trabou, negoshi propio òf unifikashon familiar, ku un enfoke speshal riba protekshon i futuro di menor di edat.
Ademas di e impakto humano, Rib’e Lugá ta kontribuí na redukshon di ekonomia informal, mehorashon di seguridat i un maneho di migrashon mas strukturá pa futuro. Ministerio di Hustisia lo traha huntu ku diferente “trusted partners” pa brinda guia kaminda ta nesesario. E Ministerio ta enfatisá ku tur persona por hasi nan registrashon nan mes, sin mester di intermediario. Ta konsehá personanan interesá pa kuminsá prepará nan dokumentonan i sigui tur informashon aktualisá via e kanalnan ofisial di Gobièrnu. Pronto lo lansa un wèpsait kaminda tur informashon lo ta disponibel.
Pa mas informashon:
www.facebook/Ribeluga
