Publiká riba 11 Ougùstùs 2025
Willemstad – Gobièrnu di Kòrsou a reuní awe, djaluna 11 di ougùstùs 2025, ku diferente partner ku ta importante pa hasi implementashon di ‘cell broadcast’ posibel. ‘Cell broadcast’ ta un teknologia pa alertá, alarmá i informá pueblo den kaso di situashonnan di peliger manera un krísis of desaster den un tempu hopi kòrtiku.
E reunion tabata den kontinuashon di e tèst ku Tim di Krísis a hasi na mart último ku un resultado positivo. Promé Minister Pisas, alabes Minister di Asuntunan General, tambe tabata presente na e okashon aki den su ròl di ‘Opperbevelhebber’ ku e tin na momentu ku a deklará un krísis i durante e tèst a aktivá e sistema di ‘cell broadcast’.
Mirando e importansia pero tambe benefisio di por disponé di e teknologia aki pa alarmá i informá nos pueblo, pero tambe turistanan na Kòrsou, Minister Middelhof di Desaroyo Ekonómiko tabata presente pa ser informá di e proseso ku ta andando pa ku ‘cellbroad cast’. Minister Cooper di VVRP tambe tabata presente komo titular responsabel pa telekomunikashon.
Gobièrnu di Kòrsou i tim di Krísis huntu ku departamentonan manera KPC, WJZ, RAC, Brantwer, Meteo i DRR, a analisá e benefisio di ‘cell broadcast’ pa e prosesonan di e organisashonnan aki, fuera di situashon di krísis. Ta e intenshon pa Gobièrnu di Kòrsou kontinuá awor ku e diferente trayektonan manera adaptashon di lei, determiná struktura pa inkorporashon di e sistema den ‘centrale meldkamer’ i palabrashon i reglanan pa uso di e sistema dor di e diferente partnernan di interes.
Poko poko pero sigur Gobièrnu di Kòrsou ta rumbo pa e implementashon di e ‘cell broadcast’ aki na Kòrsou i asina optimalisá seguridat di nos komunidat.
