Publiká riba 20 Ougùstùs 2025
WILLEMSTAD – Djárason 20 di ougùstùs, Konseho di Minister a keda informá tokante e situashon aktual di seguridat. Motibu di e reunion akí tabata e anunsio tokante intensifikashon di e unidatnan merikano den Karibe.
E informashon a keda duná na Konseho di Minister dor di Komandante di Marina Real di Hulanda den Karibe, kòmandùr Walter Hansen, i direktor di Servisio Nashonal di Seguridat (VDC), sr. Jérôme Beeldsnijder. Komo departamento di Reino Hulandes, Ministerio di Defensa ta enkargá ku defensa den Reino, inkluyendo e parti Karibense di Reino.
E motibunan menshoná dor di gobièrnu merikano pa desplegá personal i rekursonan, ta pa intensifiká e operashonnan kontra narkotráfiko. E barkunan envolví den e operashonnan akí pues ta bon biní na Kòrsou pa, manera ta kustumber, abastesé nan suministro, inkluyendo kombustibel. E presensia di unidatnan merikano den nos region ta kuadra ku práktikanan di trabou eksistente entre nos paisnan. E Forward Operating Location (FOL) kaminda Hulanda, Merka i Kòrsou ta kolaborá huntu riba operashonnan kontra narkotráfiko den nos region, ta un ehèmpel di esaki.
E relato na Konseho di Minister a tuma lugá riba petishon di Promé Minister Pisas. Gobièrnu di Kòrsou ta sigui vigilá e situashon, komo ku seguridat di nos pais ta primordial.
