Publiká riba 08 Febrüari 2023
Korte den promé instansia e disidí den su sentensia provishonal riba 15 di mart 2021 ku no tin trato desigual den sentido ku DOS si ta haña finansiamentu sufisiente pe enseñansa ku e ta ofresé i VPCO no.
Den su sentensia di 6 febrüari 2023 korte den promé instansia a disidí sinembargo ku for di aña 1998 no a indeksá i/òf adaptá tarifanan i normanan ku ta usa den e método de finansiamentu di enseñansa i ku esaki aparentemente ta e motibu ku VPCO ta eksperensia un eskases pa ku e gastunan ku nan ta hasi. Gobièrnu no ta di akuerdo ku e desishon i konsiderashonnan aki di korte den promé instansia. Pa e motibu aki gobièrnu lo apelá e sentensia.
Kontrario na loke korte den promé instansia a disidí gobièrnu a presentá por ehèmpel vários dokumento ku ta demostrá ku tabatin adaptashonnan i ku e finansiamentu den tur ámbito a subi ku mas o ménos 40%. Tambe gobièrnu a demostrá kua norma di finansiamentu no mester keda adaptá òf no ta posibel pa adaptá.
Finansiamentu di enseñansa no por ta a base di gastunan real ku direktivanan di skol ta hasi. Di akuerdo ku nos leinan di enseñansa i Landsverordening Comptabiliteit 2010, Landsverordening financieel beheer i Rijkswet financieel toezicht Curaçao en Sint Maarten esaki no ta posibel ni deseabel. No por obligá gobièrnu hiba un maneho finansiero iresponsabel djis pa kumpli ku deseonan di VPCO. Gobièrnu na promé lugá mester sòru pa un diseño di finansa públiko prudente i un repartishon hustu di e rekursonan skars.
Djabièrnè 17 di febrüari 2023 hues atministrativo (“LAR rechter”) lo trata seis (!) kaso ku VPCO a kuminsá kontra di Minister di Enseñansa, Siensia, Kultura & Deporte. E hues atministrativo (“LAR rechter”) mester bai evaluá independiente di e sentensia den e kaso sivil si e finansiamentu ku VPCO ta risibié ta konforme lei òf no.
Den e fase aki lo no duna mas komentario riba e kasonan.
_____________________________
Sr. Sithree van Heydoorn
Minister di Enseñansa, Siensia, Kultura & Deporte
08-02-2023
