Publiká riba 03 Desèmber 2020
Dia 2 di desèmber a konmemorá Dia Internashonal pa Abolishon di Sklabitut ku a keda proklamá pa Nashonnan Uní. Segun ILO mas ku 40 mion hende rònt mundu ta víktima di sklabitut moderno den forma di entre otro trabou fòrsá, matrimonio fòrsá i trafikashon di hende. E fecha akí ta forma parti di e Siklo di Restourashon ku Gobièrnu di Kòrsou a proklamá riba 17 di ougùstùs 2020, den kuadro di 225 aña Lucha pa Libertat i den e espíritu di proklamashonnan di Nashonnan Uní.
E poster tin un karakter edukativo i ta sirbi pa konsientisá pueblo di e fechanan tantu nashonal komo internashonal ku tin di haber ku e historia di sklabitut. A hasi e entrega na konseho di Minister komo símbolo di representashon di nos komunidat. Esaki ta sirbi komo un fuente di stimulashon di konsientisashon di pueblo, komo vehíkulo di desaroyo di nos identitat kolektivo i tambe komo vehíkulo pa konstrukshon di nos nashon. Den e periodo ku ta bini e kalendario den forma di poster akí ta keda kompartí ku skolnan pa e ta un kaminda bisto, pa asina konsientisá skolnan pa hasi mas rondó di e fechanan ku nan muchanan.
E siklo ta konsistí di 7 fecha ku huntu ta marka e siklo anual pa asina duna realse na nos fechanan históriko i fechanan proklamá pa Nashonnan Uní. Di e forma akí por konmemorá sklabitut i su herensha i aportá na nos lucha pa emansipashon. E fechanan di Restourashon ta importante pa stimulá konsientisashon tokante sklabitut i su efekto riba bida diario aki na Kòrsou. Esaki kompañá pa konsientisashon i akshon konkreto pa eliminá efektonan negativo di sklabitut den nos komunidat i konstruí un konbibensha emansipatorio na Kòrsou, basá riba e balornan fundamental: Libertat, Igualdat i Fraternidat.
**Riba potrètnan athunto por tuma nota di entrega for di man di Presidente di Plataforma Sklabitut i Herensia di Sklabitut sr. Frank Kirindongo na Konseho di Minister.
**Anekso _Potrèt i kalendario
