Publiká riba 06 Yanüari 2026
WILLEMSTAD – Ku lansamentu di e trayekto Ami ta Prepará, Gobièrnu di Kòrsou ta tuma un paso importante den fortalesé e resiliensia i seguridat di nos komunidat. E trayekto nobo di konsientisashon akí su meta ta pa informá, prepará i aktivá komunidat di forma ku e por ta mas konsiente ora ta trata di riesgo, krísis i kalamidatnan.
E profil di riesgo aktual di Kòrsou (2023–2028) ta indiká ku nos isla tin un total di 35 riesgo. Algun di nan ta riesgo natural i teknológiko, pero tambe desaroyonan sosial, digital i geopolítiko. No tur suseso serio ta nifiká un krísis, pero ta importante pa nos komo pais ta bon prepará, sa kon nos mester aktua, ki akshon pa tuma i kon pa hasi esaki na un manera efektivo.
Ku Ami ta Prepará e énfasis ta kambia di reakshoná riba un krísis, pa ta prepará promé ku un krísis sosodé. E trayekto su meta prinsipal ta: prepará pueblo pa e ta outosufisiente den un situashon di kalamidat pa asina duna servisionan di emergensia e espasio nesesario pa atendé ku gruponan mas vulnerabel promé. P’esei ta esensial pa tur hende ku por, sa kon pa protehá su mes, su famia i hendenan rondó di dje. Ami ta Prepará ta duna tep i sosten na pueblo ku informashon via diferente medionan di komunikashon. Tambe e informashon lo ta disponibel den 4 idioma pa e mensahe por yega na tur siudadano. Informashon manera numbernan di emergensia, kiko mester tin den un pakete di emergensia, kon pa prepará un plan di akshon i kon pa yuda otronan ta kosnan ku nos komo siudadano mester kuminsá para ketu na dje i prepará p’e.
Un komunidat bon prepará ta mas fuerte, mas trankil i mas resiliente. Ta importante pa aklará ku, apesar di situashonnan den region, lansamentu di e trayekto Ami ta Prepará no ta nifiká ku tin ningun indikashon di un peliger inmediato. Al kontrario, e trayekto ta hustamente pa ofresé trankilidat, konfiansa i perspektiva di akshon. E ta, mas ku tur kos, un forma di konsientisashon. Pa asina nos por sigui traha huntu riba un komunidat seif, resiliente i bon informá. E meta al final ta pa preparashon bira parti di nos kultura i aktividatnan regular. Pasó un krísis no ta avisá e momentu, e ora k’e ta bini, òf si e ta bini mes. P’esei entrante e aña akí lo kuminsá i sigui konsientisá tur siudadano di un forma struktural pa medio di Ami ta Prepará.
Ami ta Prepará ta desaroyá a base di e Plan Stratégiko di Komunikashon di Riesgo i Krísis 2025-2030 i ta forma e implementashon práktiko di e maneho di Gobièrnu riba e tereno akí. E trayekto ta realisá den kolaborashon ku entro otro Servisio di Seguridat di Kòrsou (VDC), Direktorado di Kontrol di Riesgo i Maneho pa Kalamidat (DRR) i e organisashon di krísis CRBo, i e ta alineá ku e strategia di seguridat mas amplio di Reino.
Por subi riba website amitaprepara.cw pa kuminsá haña algun informashon básiko. Ku tempu lo sigui agregá informashon te ora kubri tur 35 riesgo den e profil di riesgo. Sigui kanalnan ofisial di Gobièrnu di Kòrsou pa mas informashon di Ami ta Prepará.
