Publiká riba 29 Yanüari 2018
WILLEMSTAD — Promé Minister Rhuggenaath i Sr. Richard Blewitt, Resident Coördinator United Nations Development Programme (UNDP) pa Trinidat i Tobago, Kòrsou, Aruba, St. Maarten i Sürnam a firma un akuerdo di kolaborashon pa duna sosten na implementashon di nos Plan Nashonal di Desaroyo di Kòrsou (2015 -2030) i e proseso pa aliña tur nos metanan nashonal ku e agènda internashonal 2030 ku ta metanan internashonal pa desaroyo sostenibel, e ‘Sustainable Development Goals’ (SDGs).
Manera ta konosí Kòrsou tin un Plan Nashonal di Desaroyo ku a keda ratifiká na aña 2016 pa gobièrnu, bou di liderazgo di Minister Rhuggenaath den su kapasidat anterior di Minister di Desaroyo Ekonómiko. E gabinete aktual, huntu ku partnernan sosial, manera Plataforma pa Diálogo Nashonal Kòrsou ta Avansá, ta para tras di implementashon di e Plan Nashonal di Desaroyo i a inkluí esaki den e Programa di Gobernashon. E implementashon di e pilar ekonómiko ya ta kanando ku intervenshonnan a plaso kòrtiku pero ku atenshon riba diferente área di enfoke prinsipal, por ehèmpèl turismo, logístika, klima di invershon, eksportashon, inovashon i promoshon di invershon.
Ku e akuerdo resién firmá ku UNDP lo tin un kolaborashon intenso pa aselerá implementashon di e otro pilarnan di e Plan Nashonal di Desaroyo kual ta Enseñansa (Ministerio OWCS), Durabilidat (Ministerio GMN), Identidat Nashonal (Ministerio AZ) i Bon Gobernashon (Ministerio BPD). Den e proseso lo enbolbí aktornan den hinter komunidat, manera sektor privá pero tambe organisashonnan/partnernan sosial i sivíko.
Den kuadro di e esfuersonan pa implementashon di e Plan Nashonal di Desaroyo lo tin seshonnan di planifikashon, kordinashon i treinen pa empleadonan di tur ministerio, tambe den kuadro di e Agènda Internashonal di SDGs, e metanan pa desaroyo sostenibel. Pa fin di aña Kòrsou lo mester tin un SDG Roadmap kual ta hasi visibel kon nos ta bai logra avanse riba implementashon di SDGs por medio di nos instrumentonan nashonal manera nos Plan Nashonal pa Desaroyo, nos Programa di Gobernashon i nos Programa di Urgensia.
Parti di e kolaborashon ku UNDP tambe ta pa sostené ku analisis di datos riba kombatimentu di pobresa i di faktornan ku ta influensiá ku personanan por sali for di e siklo di pobresa, pero tambe kiko ta e faktornan pa nan no bolbe bai bèk den e situashon di pobresa. Ademas lo tin sosten pa e proseso di Diálogo Nashonal di Enseñansa huntu ku Ministerio di Enseñansa, Siensia, Kultura i Deporte.
Ku e akuerdo aki Gobièrnu di Kòrsou ta enfatisá ku e ta duna atenshon na diferente árean di prioridat pa pueblo di Kòrsou i asina komprometé ku implementashon di e plannan aktual na un manera integral i efisiente ku enbolbimentu di tur ministerio.
Ku implementashon di e Plan Nashonal di Desaroyo ta duna realse na prioridatnan riba nivel lokal kaminda e pueblo lo mira resultadonan konkreto ku lo trese desaroyo positivo i duradero pa Kòrsou riba e pilarnan ariba menshoná. Ademas esaki lo hasi posibel ku riba nivel internashonal Kòrsou por mustra su progreso tambe riba e Agènda 2030 i asina por midi su mes ku otro paisnan rònt mundu. Gobièrnu ta agradesido tambe na Ministerio di Asuntunan Interior i Relashonnan di Reino na Hulanda pa e kontribushon finansiero ku nan a hasi pa di e forma aki kontinuá i aselerá implementashon di prioridatnan nashonal.
Riba potrèt por mira e momentu di firmamementu di e akuerdo di kolaborashon entre Promé Minister di Kòrsou sr. Eugene Rhuggenaath i sr. Richard Blewitt Resident Coördinator di UNDP pa Trinidat i Tobago, Kòrsou, Aruba, St. Maarten i Sürnam.
