Publiká riba 10 Yanüari 2025
GOBIÈRNU DI KÒRSOU TA INVERTÍ DEN DESAROYO PROFESIONAL DI SU EMPLEADONAN
Willemstad – Djabièrnè, 10 di yanüari 2025, Minister Shalten Hato di Ministerio di Bestuur, Planning i Dienstverlening (BPD) a firma ofisialmente e asignashon pa kontinuá e koperashon entre e Government Academy i SOAB LearningLab. E Programa di Formashon di Gobièrnu di Kòrsou (OOP: Overheidsbreed Opleidingsprogramma) a alkansá un logro importante relashoná ku su ehekushon for di dia ku a kuminsá na 2024.
CCP-OOP (Centraal Coördinatiepunt- Overheidsbreed Opleidingsprogramma) ta un inisiativa stratégiko di gobièrnu di Kòrsou i ta enfoká riba kresementu i desaroyo profeshonal di funshonario na tur nivel. Dor di invertí den konosementu, abilidatnan i kompetensianan di e personal di gobièrnu. E meta ta pa mehora strukturalmente e kalidat di e servisio públiko.
Government Academy i SOAB LearningLab ta forma e punto sentral di Kordinashon pa e programa aki. Den 2025, lo sigui desaroyá CCP-OOP, hasi evaluashon i organisá formashon i kurso innovativo pa e personal di gobièrnu. CCP-OOP lo promové un kultura di siña kontinuo i desaroyo pa tantu ehekutivonan komo empleadonan. E mentalidat di ‘lifelong learning’ ta garantisá ku e aparto gubernamental ta prepara pa e reto di futuro i e medio ku ta kambia rápido na e manera ku e ta funshonando.
Abilidatnan manera liderasgo, orientashon na klient i tambe konosementu i abilidatnan spesialisá (relashoná ku funshon spesífiko) ta keda ofresé. Tópikonan manera seguridat sibernétika, inteligenia artifisial (AI), komunikashon i desaroyo personal tambe ta forma parti di e programa.
Durante e firmamentu, Minister Hato a enfatisá riba importansia di invertí den kapital humano komo e forsa prinsipal tras di un gobièrnu efisiente i inovativo. Ku e koperashon aki, gobièrnu di Kòrsou ta logra un paso importante pa profeshonalisá mas su kuerpo di funshonarionan i pa desaroyo sostenibel di e sektor públiko.
Imagennan: – Firmamentu di e akuerdo
– Entrega di e karta di asignashon
