Publiká riba 12 Yüni 2025
Willemstad – E hóbennan ku a partisipá den Formashon Sosial (SVT) ‘Un Komienso Nobo’ na Kazèrne di Marina Suffisant a risibí nan barèt. E grupo akí a kuminsá na komienso di mart 2025 ku e promé fase di e trayekto, bou di guia di Defensa Hulandes i trahadónan sosial di FAJ. Durante e fase di kuater luna, nan a siña balornan i normanan manera disiplina, rèspèt propio, struktura, resilensia, konfiansa i sentido di responsabilidat.
Riba 12 di yüni, 12 hóben hòmber a risibí nan barèt ku nan a meresé i tambe un sertifikado, durante un seremonia kòrtiku den presensia di tur e partidonan envolví.
Siguiente fase
E 12 hóbennan lo kuminsá di inmediato ku e di dos fase: e “leerwerktraject” (LWT). Durante e fase akí, nan ta sigui desaroyá nan mes i ta prepará pa un funshon riba merkado laboral, ku ta pas ku nan kapasidat. E trayekto ta tuma lugá bou di guia di e organisashon sosial Gwen Inspires.
Ku e dos fasenan aki, Gobièrnu di Kòrsou huntu ku Defensa Hulandes ta ofresé perspektiva i oportunidat nobo na e hóbennan akí.
Realisashon di e koperashon
E proyekto akí a bira realidat den e kuadro di e palabrashonnan entre Kòrsou i Hulanda, komo parti di e pakete di reforma (Landspakket). E reforma akí ta inkluí bou di tema ‘H18’, konosí komo Programa di Formashon Sosial / Sociaal Vormingstraject.
E trayekto ta un koperashon entre Ministerio di Hustisia, Ministerio di Desaroyo Sosial, Labor i Bienestar (SOAW), Ministerio di Enseñansa, Siensia, Kultura i Deporte (OWCS) i Ministerio di Defensa.
Grupo nobo lo kuminsá den ougùstùs 2025
Den ougùstùs 2025, un grupo nobo di hende muhé lo kuminsá ku e trayekto. Ainda tin espasio pa partisipantenan nobo. Si bo tin entre 18 i 24 aña di edat, bo por manda un mensahe via WhatsApp na +5999 563 6626 pa mas informashon.
