Publiká riba 14 Òktober 2025
WILLEMSTAD – Promé Minister Pisas ta konsiderá e ròl di prensa komo algu fundamental den formashon di opinion públiko. Pa e motibu ei ta importante pa prensa publiká informashon korekto i verifiká.
Ayera, dia 13 di òktober 2025, e korant Antilliaans Dagblad a publiká un artíkulo titulá “Gaming nu onder Pisas”, ku ta kontené informashon inkorekto tokante e responsabilidat ministerial pa ku e Fundashon Gaming Control Board (GCB), aktualmente operando bou di e lei nobo (LOK) komo Curaçao Gaming Authority (CGA).
Ribe e mésun dia ku e artíkulo a sali, Promé Minister Pisas a laga publiká un komunikado di prensa bisando ku, segun e dekreto di 19 di ougùstùs último, e responsabilidat polítiko pa e sektor di wega di azar ta pertenesé na e Minister di Hustisia di Kòrsou, sr. Shalten Hato, i no ta serka Promé Minister. Tambe a tuma kontakto ku Antilliaans Dagblad pa hasi e rektifikashon nesesario, pero lamentablemente e korant no a publiká ningun korekshon, miéntras otro medionan di komunikashon si a hasi e esfuerso pa informá komunidat korektamente. Entretantu GCB/CGA tambe a hasi un publikashon al kaso.
Promé Minister Pisas ke laga enfatisá ku: “Medionan di komunikashon tin influensia grandi riba formashon di opinion den nos komunidat. Pero influensia ta bini ku responsabilidat tambe. Den e kuadro ei, publikashon di informashon korekto òf verifiká ta un deber di prensa pa ku komunidat. Aparte di esei informashon korekto ta e base pa transparensia i konfiansa entre pueblo i gobièrnu. I aki e ròl di prensa ta sumamente importante. Ora informashon ta wòrdu publiká dor di prensa sin verifikashon esaki ta krea konfushon innesesario. Ta p’esei prensa mester hasi rektifikashon inmediato tambe ora e instansia konserní demostrá ku e informashon publiká anteriormente ta inkorekto.”
Klik aki pa lesa e komunikado di Curaçao Gaming Authority (CGA).
Klik aki pa lesa e Landsbesluit di 19 di ougùstùs 2025.
Aki ta sigui dos artíkulo, unu di e korant Vigilante i e otro di e korant Antilliaans Dagblad:
