Notisia

WILLEMSATD – Riba djaweps 16 di yanüari 2020, den un ambiente hopi festivo a realisá e inougurashon di Sala Deportivo Multifunshonal Pedro ‘Shon Pe’ Hooi na Barber. E apertura a konta ku presensia di Mandatarionan, Obispo, sr. Anthony Godett, Habitantenan di pueblo di Banda Bou i Muchanan di e skol nan Ala Blanca, San Hosé i VSBO Joseph Civillis, ku ta e skolnan den bisendario ku ta bai hasi uso di e fasilidat aki durante siman mainta.

Despues di ora di skol e fasilidat ta disponibel pa komunidat di Barber i Kòrsou. Ku esaki kabinete Rhuggenaath ke realisá “un Kòrsou den moveshon” pa nos entre otro rekreá, sosialisá, kompetí i traha riba nos salú.

E mainta ameno a konta tambe ku presensia di ministernan Zita Jesus-Leito i Marilyn Alcalá-Wallé ku a pusha pa e proyekto aki wòrdu realisá. Entre e otro presentenan tabatin alabes sr. Anthony Godett ku a pone e tereno disponibel, Obispo Secco i reverendo ku a batisá e sala, pastor di Barber, sr. Rutilio Rooi i Shon Pe Hooi na ken e sala ta karga e nòmber. Bisiñanan tambe tabata bon representá.

Fundashon Desaroyo Deportivo Kòrsou (FDDK) ta bai manehá e fasilidat deportivo aki. Alabes a hasi un apelashon pa tur hende kuida e sala pa asina nos mantené nos Sala di un forma ordená pa henter komunidat di Banda bou por hasi uzo di djé.

Pabien na pueblo di Kòrsou!!

Pa mas potrèt di e aktividat klik aki: Inougurashon Sala Multifunshonal Pedro ‘Shon Pe’ Hooi

Pa un bista di e aktividat den forma di video por klik aki:

MAS NOTISIA

Ministerio konserní: Enseñansa, Siensia, Kultura & Deporte