Inskripshon pa BEKA TULA
Publiká riba
11 Yüni 2024
WILLEMSTAD – Minister di Enseñansa, Siensia, Kultura i Deporte di Kòrsou sr. Sithree van Heydoorn i Minister di Enseñansa, Kultura i Siensia di Hulanda sr. Robbert Dijkgraaf a firma un akuerdo mutuo kaminda ta pone fondo disponibel pa duna beka na un studiante di Kòrsou den kuadro di “Slavery Memorial year” pa sigui e estudio di dosente di historia na un Hogeschool na Hulanda. E beka ta keda otorgá na un studiante pa aña universitario durante e siguiente 4 añanan akadémiko (2024-2025, 2025-2026, 2026-2027 i 2027-2028). Un total di 4 studiante lo por hasi uso di e Beka Tula. E montante di kada beka ta di 10.000 euro pa persona.
E kriterionan ku e studiante mester kumpli kuné pa bin na remarke pa haña e beka ta:
- mester tin diploma di SBO/HAVO/VWO;
- mester tin nashonalidat hulandes;
- ta habrí pa skirbi i hasi investigashon tokante sklabitut i nos historia kolonial;
- tin un komprobante di inskripshon di aña 2024/2025 pa estudio di dosente di historia na un instituto universitario na Hulanda;
- tin un number di BSN;
- tin un komprobante di inskripshon na DUO.
Tur studiante entre edat di 17 pa 22 aña ta bin na remarke si e ta kumpli ku e kriterionan ariba menshoná. Mester inskribí i manda e siguiente dokumentonan:
- kopia di sédula/pasport;
- un karta di motivashon motivando di kon bo ke studia historia;
- un karta di referensia di dosente di historia òf mentor ku ta splika di kon bo ta e mihó kandidato pa bin na remarke pa e Beka Tula;
- un prueba ku bo sifra pa e materia di historia ta un 7.0 òf mas i tin un sifra di 6.0 òf mas pa e materia di hulandes;
- un ensayo (essay) di 350 palabra i ku ta relashoná ku e tema di rehabilitashon di Tula.
Tur inskripshon lo ta tratá ku sekresia pa un komishon ku ta evaluá tur e inskripshonnan. Despues di evaluashon di tur inskripshon ta tene un ronda di kòmbersashon. Riba 5 di yüli di aña 2024 ta informá ken ta e studiante selekshoná pa haña e Beka Tula pa e aña universitario 2024-2025. Lo hasi entrega ofisial dia 8 di yüli na Kabinèt di Minister.
Por manda e inskripshon te ku 21 di yüni 2024 na e koreo elektróniko : communicatie@owcs.gov.cw. Pa mas informashon por tuma kontakto ku sra. Pamela Lapeña Rojer na +599 9 4343700 òf manda un mail na communicatie@owcs.gov.cw.
—
KOMUNIKASHON
